Real Madridi është lidhur në mënyrë befasuese me një transferim të kapitenit të Juventusit, Manuel Locatelli, teksa madrilenët po shqyrtojnë alternativa në mesfushë pas dështimit për të transferuar Rodrin.
Sipas Sportal, që citon gazetarin Ekrem Konur, “Los Blancos” po analizojnë disa opsione për repartin e mesfushës pas raportimeve se Rodri ka vendosur t’i bashkohet Barcelonës. Mes emrave që thuhet se po shqyrtohen nga José Mourinho është edhe Locatelli.
Do të ishte një zgjedhje e papritur dhe disi e pazakontë për gjigantin spanjoll, ndërsa vetëm përmendja e mundësisë ka bërë që tifozët e Juventusit të diskutojnë, pasi Locatelli është një prej lojtarëve më të debatueshëm në skuadrën bardhezi.
Për Juventusin, një interesim i tillë do të vinte në një moment të përshtatshëm.
“Bianconerët” kanë nevojë të sigurojnë të ardhura për të vazhduar aktivitetin në afatin kalimtar. Ata tashmë kanë transferuar Randal Kolo Muanin dhe Kerim Alajbegoviqin, ndërsa duhet të shesin lojtarë përpara se të bëjnë blerje të tjera.
Locatelli është pjesë e Juventusit që nga viti 2021 dhe deri më tani ka regjistruar 230 paraqitje me klubin. Ai është rikthyer gjithashtu të jetë pjesë e rregullt e Kombëtares së Italisë.
Vlera e tij në treg vlerësohet rreth 25-30 milionë euro, ndërsa mesfushori rinovoi kontratën me Juventusin deri në vitin 2030 vetëm në prill. Për këtë arsye, klubi torinez nuk do të kishte presion për ta shitur me një çmim të ulët.
Locatelli nuk është i vetmi mesfushor i Juventusit, e ardhmja e të cilit mbetet e pasigurt.
Edhe Teun Koopmeiners, i cili nuk ka arritur të bindë plotësisht që prej transferimit të tij për më shumë se 50 milionë euro, mund të largohet nga Torino. Newcastle ka bërë një interesim konkret për holandezin, i cili vlerësohet rreth 30 milionë euro./Telegrafi/
