Sot, kryetarja e Preshevës, Ardita Sinani, priti në takim Adelina Veliun, preshevaren që jeton dhe vepron në Kosovë.
Takimi u shoqërua edhe me një postim në rrjetet sociale nga kryetarja, ku theksohej angazhimi dhe përkushtimi i Adelinës ndaj kombit shqiptar.
Adelina Veliu mori pjesë në listën e Lëvizjes Vetëvendosje në zgjedhjet e fundit parlamentare, duke treguar guxim dhe dëshirë për të kontribuar në zhvillimin e Kosovës dhe për mbrojtjen e interesave të shqiptarëve të Luginës së Preshevës.
Edhe pa pasur një mandat, Adelina vazhdon të jetë një zë i fuqishëm për komunitetin e saj, duke mbajtur lidhjen mes diasporës dhe atdheut.
“Kjo vizitë është një mundësi për të rikujtuar se shërbimi ndaj kombit nuk lidhet me funksionin, por me vullnetin për të vepruar,” shkroi kryetarja Sinani, duke nënvizuar rëndësinë e angazhimit qytetar dhe të vazhdueshëm për kauzat kombëtare.
Takimi është një dëshmi e lidhjes së fortë midis Luginës së Preshevës dhe Kosovës, si dhe e rolit që individët e përkushtuar mund të kenë për të ndikuar pozitivisht në jetën e komunitetit.
