Nicole Kidman dhe Sandra Bullock u ribashkuan në tapetin e kuq për premierën e “Practical Magic 2” në Los Angeles, duke tërhequr vëmendjen me paraqitjet e tyre elegante dhe në stil gotik.
Kidman, 59 vjeçe, shkëlqeu me një fustan të zi transparent me dantella dhe një çarje deri në kofshë, ndërsa Bullock, 62 vjeçe, zgjodhi një fustan të gjerë prej kadifeje të zezë, me detaje transparente dhe një jakë të bardhë me dantella.
Dy aktoret, të cilat rikthehen si motrat shtriga Gillian dhe Sally Owens, u shfaqën dorë për dore në premierë, 28 vjet pas filmit të parë “Practical Magic”.
Vazhdimi sjell sërish historinë e motrave Owens dhe përpjekjet e tyre për të përballuar mallkimin familjar, shkruan DailyMail.
“Practical Magic 2” shënon gjithashtu rikthimin e Bullock në ekranin e madh pas një pauze katërvjeçare.
Në premierë morën pjesë edhe aktorë të tjerë të kastit, mes tyre Joey King dhe Maisie Williams. /Telegrafi/
