Arsenali është në negociata me Al-Hilalin për transferimin e Gabriel Martinellit, me brazilianin që mund të largohet nga “Topçinjtë” në ditët e fundit të afatit kalimtar. Sipas raportimeve të fundit, klubi saudit e ka bërë 25-vjeçarin një nga objektivat kryesorë të afatit kalimtar.
David Ornstein ka raportuar se Arsenali vlerëson Martinellin rreth 70 milionë euro, ndërsa lojtari është i hapur për një transferim në Arabinë Saudite.
Negociatat mes dy klubeve janë duke vazhduar, por deri tani nuk ka marrëveshje përfundimtare.
Një largim për një shumë të tillë do t’i siguronte Arsenalit shitjen më të shtrenjtë në historinë e klubit.
Rekordi aktual mbahet nga Alex Oxlade-Chamberlain, i cili në vitin 2017 u transferua te Liverpooli për rreth 38 milionë euro.
Martinelli është pjesë e Arsenalit që nga viti 2019, kur iu bashkua klubit nga Ituano.
Gjatë periudhës së tij në Londër, ai ka shënuar 62 gola në 278 paraqitje, por e ardhmja e tij është vënë seriozisht në dyshim pasi nuk ishte në skuadër as për Community Shield dhe as për ndeshjen hapëse të Premier Ligës.
Braziliani më herët kishte refuzuar një transferim te Galatasaray, ndërsa tani situata duket ndryshe dhe ai është i gatshëm të shqyrtojë mundësinë e kalimit te Al-Hilali.
Nëse marrëveshja arrihet afër vlerësimit të vendosur nga Arsenali, Martinelli do të bëhet shitja rekord e klubit, duke thyer një rekord që ka qëndruar në fuqi që nga viti 2017.
Për më tepër, të ardhurat nga largimi i brazilianit mund t’i japin Arsenalit hapësirë financiare për të tentuar transferime të tjera para mbylljes së afatit kalimtar. /Telegrafi/
