Kryeministri i Mbretërisë së Bashkuar, Andy Burnham, ka premtuar se do të publikojë detajet e takimeve të tij me drejtuesit e Manchester Cityt, pasi është përballur me kritika për qëndrimin e tij lidhur me çështjen e akuzave financiare ndaj klubit anglez.
Një komision i pavarur e ka shpallur Manchester Cityn përgjegjës për shkelje që lidhen me periudhën nga viti 2009 deri në vitin 2018, përfshirë kontrata tregtare të dyshuara si të rreme. Klubi ka apeluar vendimin, ndërsa sanksionet përfundimtare ende nuk janë bërë të ditura.
Duke folur në podkastin “The Rest Is Politics”, Burnham konfirmoi se është i gatshëm të bëjë publike detajet e takimeve të tij me përfaqësuesit e klubit. Së fundmi, fotot me Sheikh Mansour, pronar i Man Cityt, po qarkullojnë në media, por të gjitha ato janë në stadium
“Udhëheqësi i opozitës më ka kërkuar të publikoj detajet e takimeve të mia, gjë që me kënaqësi do ta bëj dhe do ta bëj”, deklaroi Burnham.
“Do të paraqes qartë gjithçka që kam bërë duke punuar me ta në rolin tim të mëparshëm si kryetar i Bashkisë së Mançesterit të Madh”, shtoi ai.
Burnham theksoi se takimet në fjalë nuk janë të kohëve të fundit, duke zbuluar se kishte pasur vetëm një takim të rëndësishëm me drejtuesit e klubit, në vitin 2021.
“Asnjë nga këto nuk është e kohëve të fundit, për sa u përket takimeve që kam pasur. Në fakt, pata vetëm një takim të rëndësishëm dhe ai ishte në vitin 2021”, u shpreh ai.
Sheikh Mansour, pronar i Man Cityt
Deklaratat e tij vijnë pas thirrjeve për më shumë transparencë lidhur me marrëdhëniet e tij me pronarët e Manchester Cityt. Ndërkohë, sipas raportimeve, disa klube të Ligës Premier kanë shprehur shqetësime për ndërhyrje të mundshme politike në procesin e apelimit të çështjes financiare të klubit.
Manchester City vazhdon ta kundërshtojë vendimin përmes procedurave të apelit, ndërsa çështja mbetet në qendër të vëmendjes së futbollit anglez. /Telegrafi/
