Fenerbahce ka dalë me një reagim të ashpër pas incidenteve të raportuara në derbin ndaj Galatasarayt, duke kërkuar hetim të plotë dhe ndëshkim për të gjithë personat e përfshirë në sulmet e pretenduara ndaj futbollistëve të saj.
Në komunikatën zyrtare, klubi nga Stambolli pretendon se situata u tensionua fillimisht pas fyerjeve në drejtim të Kerem Akturkoglut, përpara se incidentet të përshkallëzoheshin në përplasje fizike.
Sipas versionit të Fenerbahçes, Matteo Guendouzi u sulmua nga Serhat Dogan, pjesë e ekipit të analizës së Galatasarayt. Klubi pretendon gjithashtu se në incident u përfshi edhe Abdulkerim Bardakci, i cili dyshohet se ia tërhoqi flokët futbollistit të Fenerbahces.
Drejtuesit e klubit e kanë dënuar ashpër atë që e konsiderojnë sjellje të papranueshme, duke theksuar se tensioni që shoqëron një derbi nuk mund të përdoret si arsyetim për sulmet ndaj futbollistëve.
“Rivaliteti dhe tensioni i një derbi nuk i japin askujt të drejtën të sulmojë futbollistët tanë. Ajo që ndodhi nuk mund të justifikohet me ‘tensionin e derbit’”, thuhet në komunikatën e Fenerbahces.
Klubi kërkon që të gjitha incidentet të shqyrtohen në mënyrë të plotë dhe personat përgjegjës të përballen me masa disiplinore, pavarësisht pozitës apo rolit të tyre.
Kaos pas derbit Galatasaray – Fenerbahçe, shpërthen përleshja në fushë dhe ndërhyn policia
“Rruga për ta parandaluar dhunën në futbollin turk është që përgjegjësit të mos mbeten pa u ndëshkuar”, përfundon reagimi.
Tashmë pritet të shihet nëse organet përkatëse do të nisin procedurat për zbardhjen e plotë të ngjarjeve dhe nëse do të ketë masa disiplinore ndaj personave të përmendur./Telegrafi/
