Armëpushimi lokal ndërmjet Ukrainës dhe Rusisë është zgjeruar përtej qytetit të Oleshkys, në rajonin e Khersonit, për të mundësuar dërgimin e ndihmave humanitare dhe evakuimin e civilëve. Lajmin e bëri të ditur Melania Trump, Zonja e Parë e Shteteve të Bashkuara të Amerikës.
Sipas saj, zbatimi i marrëveshjes është përshpejtuar për dy ditë, me qëllim të garantimit të sigurisë së civilëve dhe lehtësimit të transportit të furnizimeve humanitare.
Armëpushimi synon të mundësojë dërgimin e ushqimeve, ilaçeve, ujit të pijshëm dhe furnizimeve të tjera për banorët, si dhe largimin e personave që dëshirojnë të evakuohen nga qyteti.
Oleshkya ndodhet në bregun e majtë të lumit Dnipro, në një zonë të kontrolluar nga Rusia, përballë qytetit të Khersonit.
Para pushtimit rus, qyteti kishte rreth 24 mijë banorë, por aktualisht aty kanë mbetur vetëm rreth 1700 deri në 2000 persona, kryesisht të moshuar, si dhe rreth 50 fëmijë.
Banorët përballen me mungesë të ushqimeve, ilaçeve, energjisë elektrike dhe ujit të pijshëm. Situata është përkeqësuar nga vështirësitë në furnizim, minat në rrugë dhe sulmet me dronë.
Qyteti u pushtua nga forcat ruse në fillim të invazionit të vitit 2022. Në qershor të vitit 2023, shkatërrimi i digës së Nova Kakhovkas shkaktoi përmbytje të mëdha, të cilat dëmtuan rëndë zonën.
Armëpushimi është i përkohshëm dhe synon të krijojë kushte për operacionet humanitare në një zonë ku banorët kanë mbetur të ekspozuar ndaj pasojave të luftës. /Telegrafi/
