Mbështetja për Ukrainën u shërben interesave të vetë Gjermanisë dhe synon t’i japë fund luftës së agresionit të Rusisë sa më shpejt të jetë e mundur.
Kapitullimi i Ukrainës është i papranueshëm, pasi do të nënkuptonte kapitullimin e të gjithë partnerëve të saj evropianë.
Këto komenti i ka bërë kancelari gjerman, Friedrich Merz, gjatë një diskutimi në konferencën “Berlin Global Dialogue” në Berlin, të mërkurën, sipas Ukrinform, përcjell Telegrafi.
“Ne e mbështesim Ukrainën jo për ta zgjatur këtë luftë. Ne e bëjmë këtë për t’i dhënë fund asaj sa më shpejt të jetë e mundur. Por kapitullimi i Ukrainës, apo edhe kapitullimi i pakushtëzuar, nuk është një opsion, sepse kjo do të nënkuptonte kapitullimin e të gjithëve ne”, citohet të ketë thënë Merz.
Ai tha se pikërisht për këtë arsye Gjermania vazhdon të ofrojë ndihmë të konsiderueshme për Ukrainën, duke e parë atë si një çështje të sigurisë së saj.
“Kjo është pikërisht arsyeja pse unë e mbështes Ukrainën me kaq vendosmëri. Është në interesat tona. Është plotësisht në interesat tona”, ka theksuar kancelari Merz.
Kancelari komentoi gjithashtu përpjekjet diplomatike për t’i dhënë fund luftës, përfshirë bisedimet e zhvilluara në Oslo një ditë më parë, në të cilat morën pjesë presidenti ukrainas Volodymyr Zelensky, përfaqësues amerikanë dhe liderë evropianë.
“Dje në mbrëmje në Oslo u zhvillua një takim me Zelenskyn dhe përfaqësuesit tanë nga Evropa, dhe ne bëmë njëfarë përparimi në këtë diskutim. Ne jemi gjithmonë të gatshëm për negociata”, tha ai.
Merz theksoi se agresioni rus shtrihet shumë përtej luftës kundër Ukrainës dhe vë në shënjestër rendin politik të vendosur në Evropë pas vitit 1990.
“Kjo nuk është thjesht një luftë në Ukrainë. Është një sulm thelbësor ndaj të gjithë rendit politik që ne vendosëm pas vitit 1990”, tha kancelari gjerman.
Merz paralajmëroi gjithashtu se Rusia kërcënon lirinë dhe sigurinë e të gjithë kontinentit evropian.
Operacionet e saj hibride, duke përfshirë sabotimet, sulmet kibernetike, përdorimin e dronëve dhe dezinformimin, vazhdojnë të kërcënojnë sigurinë dhe prosperitetin e vendeve evropiane.
Siç kujtojnë mediat, më 20 tetor, presidenti ukrainas Volodymyr Zelensky zhvilloi bisedime në Oslo me të dërguarin e presidentit amerikan, Steve Witkoff. Në takim morën pjesë gjithashtu kryeministri norvegjez Jonas Gahr Støre dhe presidenti finlandez Alexander Stubb.
Palët diskutuan mënyrat për t’i dhënë fund luftës, garancitë e sigurisë për Ukrainën, çështjet territoriale dhe sanksionet. Pas takimit, Witkoff udhëtoi drejt Rusisë. /Telegrafi/
