Revista amerikane The Atlantic ka publikuar një artikull në të cilin pretendohet se ish-shefi i shërbimit inteligjent egjiptian, Abbas Kamel, u kishte përcjellë zyrtarëve të lartë izraelitë një paralajmërim për përgatitjet e Hamasit për një sulm të madh në tetor të vitit 2023.
Sipas raportit, ky paralajmërim u dha pak para 7 tetorit 2023, gjatë një qëndrimi të shkurtër të Kamelit në aeroportin Ben Gurion në Izrael. Sipas të dhënave të fluturimeve, avioni i tij qëndroi në Izrael për 67 minuta.
Për paralajmërimet e pretenduara nga Egjipti u raportua në media vetëm dy ditë pas sulmit. Në atë kohë, agjencia Associated Press, duke iu referuar një zyrtari egjiptian të inteligjencës, raportoi se Izraeli kishte injoruar mesazhet se Hamasi po planifikonte “diçka të madhe”.
Gjithashtu, portali izraelit Ynet kishte publikuar informacione se Kamel e kishte paralajmëruar personalisht kryeministrin izraelit Benjamin Netanyahu dhjetë ditë para sulmit.
Raporti i ri i The Atlantic sjell sqarime shtesë, duke theksuar se Kamel, gjatë një takimi më 26 shtator, nuk kishte paraqitur të dhëna të sakta të inteligjencës për kohën apo mënyrën e sulmit. Në vend të kësaj, pretendohet se ai kishte thënë se Izraeli duhej ta ndryshonte urgjentisht qasjen e tij, ose rrezikonte një përshkallëzim të plotë në Gaza.
Sipas revistës, rekomandimi i tij ishte që Izraeli të bënte lëshime të tjera ekonomike ndaj Hamasit, me qëllim parandalimin e një zhvillimi të tillë. Megjithatë, mbetet e paqartë nëse dhe si reaguan zyrtarët izraelitë ndaj këtyre pretendimeve.
“Nëse nuk e ndryshoni kursin, Gaza do t’ju shpërthejë në fytyrë”, citohet të ketë thënë ai, sipas revistës.
Nga ana tjetër, udhëheqja izraelite i ka hedhur poshtë këto pretendime. Edhe pse zëdhënësit e kryeministrit Netanyahu nuk iu përgjigjën kërkesës së The Atlantic për koment, zyra e tij më herët i kishte mohuar pretendimet për një paralajmërim të drejtpërdrejtë nga Kamel.
Gjithashtu, Tzachi Hanegbi, i cili në atë kohë ishte këshilltar për sigurinë kombëtare të Izraelit, i ka mohuar plotësisht pretendimet e revistës, duke mohuar edhe vizitën e zyrtarit egjiptian më 26 shtator, si dhe ekzistencën e çfarëdo paralajmërimi nga Egjipti.
Në një hetim të publikuar së fundmi, gazeta Haaretz pretendon se presidenti i Emirateve të Bashkuara Arabe e kishte paralajmëruar kryeministrin izraelit, disa javë para sulmit të 7 tetorit, se Hamasi po planifikonte një operacion të madh. Sipas raportimit, kryeministri izraelit e kishte hedhur poshtë paralajmërimin dhe nuk i kishte informuar për të drejtuesit izraelitë të sigurisë dhe ushtrisë.
Ky paralajmërim, sipas Haaretz, ishte dhënë gjatë një bisede telefonike që kishte zgjatur 45 minuta.
“Emiri shpjegoi se, sipas vlerësimit të tij, lideri i Hamasit, Yahya Sinwar, po përgatitej për një ngjarje të madhe”, ka thënë këshilltari i sundimtarit të Emirateve të Bashkuara Arabe, i cili kishte marrë pjesë në atë bisedë. /Telegrafi/
