Një foshnjë ka lindur në ishullin e largët skocez North Ronaldsay për herë të parë pas më shumë se tri dekadash.
Duncan Wilder Thorstein Traill Suarez Ford lindi më 15 shtator, duke shënuar lindjen e parë në ishull pas 34 vitesh, siç i tha CNN të enjten nëna e tij, Alice Traill Ford.
North Ronaldsay është ishulli më verior i arkipelagut Orkney dhe ka një gjatësi prej vetëm tre miljesh dhe gjerësi prej dy miljesh.
Traill Ford, i fejuari i saj Jorge Suarez dhe familja e tyre e ndajnë kohën mes Kosta Rikës dhe North Ronaldsay-t; plani fillestar ishte që Duncan të lindte në Kosta Rikë, tha ajo, përcjell Telegrafi.
Familja i kishte rezervuar biletat e kthimit kur mbërriti në North Ronaldsay, por plani i lindjes ndryshoi sapo ata zbritën aty.
“E kuptova menjëherë se ajo do të ishte lindja më e veçantë, më magjike dhe më mbështetëse që mund t’i dhuroja atij”, tha Traill Ford, familja e së cilës e bleu ishullin në vitin 1727.
“Lidhja ime me ishullin është ajo që më sjell sërish këtu çdo vit”, theksoi ajo. “Çdo vit, që kur isha foshnjë”.
“Ndjej se ky ishull ka luajtur rol në rritjen time dhe pikërisht për këtë arsye ndjeva një lidhje dhe përkatësi të jashtëzakonshme me energjinë e këtij vendi, veçanërisht në shtëpinë e të parëve të mi”, shtoi Traill Ford, e cila lindi në Holland House, shtëpi e ndërtuar nga paraardhësit e saj.
Sipas të dhënave të qeverisë skoceze për vitin 2024, popullsia e ishullit ishte 72 banorë. Traill Ford i tha CNN-it se tani në North Ronaldsay jetojnë 51 persona.
“Të gjithë janë shumë të entuziazmuar”, tregon Traill Ford, e cila shpërndau shishe të vogla uiski të dekoruara. /Telegrafi/
