Mbrojtja Civile Saudite lëshoi të enjten një seri të shkurtër alarmesh, përfshirë një për qytetin e Mekës, shtëpia e vendeve më të shenjta të Islamit, në paralajmërime që zakonisht tregojnë një kërcënim të mundshëm me raketa ose dronë.
“Një paralajmërim është lëshuar nga Platforma Kombëtare e Paralajmërimit të Hershëm në Qytetin e Mekës për të paralajmëruar për një rrezik të mundshëm”, tha ajo, me paralajmërime të veçanta për guvernatorin e Detit të Kuq të Yanbusë, si dhe rajonet Taif, Jeddah dhe Tabuk.
Në javët e fundit, alarmet shpesh kanë paraprirë sulmet nga grupi Houthi i Jemenit të mbështetur nga Irani, shkruajnë mediat e huaja, përcjell Telegrafi.
Më vonë të enjten, zëdhënësi i Koalicionit për Mbështetjen e Legjitimitetit në Jemen, Gjeneral Major Turki al-Malki, tha se Arabia Saudite ka ‘kapur’ gjashtë raketa balistike të lëshuara nga Houthit.
Ai shtoi se përshkallëzimi dhe shkeljet e Houthit do të trajtohen me vendosmëri.
Ndërkohë, Mbreti Salman bin Abdulaziz Al Saud i Arabisë Saudite e kishte cilësuar lëvizjen e armatosur Houthi të Jemenit si një “milici terroriste” dhe e ka akuzuar grupin e lidhur me Iranin se ka shënjestruar në mënyrë të përsëritur qytetin e shenjtë të Mekës.
Monarku saudit 90-vjeçar i bëri këto komente gjatë një mbledhjeje të kabinetit të martën, siç raportoi Agjencia Zyrtare Saudite e Lajmeve (SPA), shkruan Al Jazeera, përcjell Telegrafi.
Kjo vlerësohet si një ndërhyrje e rrallë dhe e ashpër e mbretit në çështjet aktuale, pasi shumica e punëve të përditshme drejtohen nga djali i tij, Princi i Kurorës Mohammed bin Salman.
Monarku saudit vlerësoi forcat ushtarake dhe shërbimet e sigurisë për “mbrojtjen e atdheut dhe përballjen me vendosmëri ndaj çdo agresioni kundër vendeve të shenjta, pelegrinëve, qytetarëve dhe banorëve të Mbretërisë”. /Telegrafi/
