Një tjetër incident i rëndë me armë trondit Shtetet e Bashkuara. Dy persona kanë humbur jetën dhe gjashtë të tjerë janë plagosur, përfshirë tre policë, pas një sulmi me armë në një ndërtesë shumëkatëshe në Minneapolis, Minnesota.
Sipas raportimeve të mediave lokale, policia u njoftua rreth orës 16:36 të së mërkurës, pas raportimit për të shtëna me armë. Kur efektivët mbërritën në ndërtesë, ata gjetën viktimat dhe dëgjuan të shtëna të tjera.
Policët ndoqën zhurmën e armës drejt një kati të sipërm, ku u përballën me një situatë veçanërisht të rrezikshme. Një mjegullim i dendur në ambient kufizoi ndjeshëm shikueshmërinë, ndërsa tre efektivë u plagosën, dy prej tyre nga të shtënat.
Sipas televizionit lokal KARE, ngjarja dyshohet se nisi si një konflikt familjar mes autorit dhe një prej viktimave. Më pas, i dyshuari hapi zjarr edhe ndaj policëve që kishin mbërritur në vendngjarje dhe u tërhoq në një apartament.
Autoritetet konfirmuan se i dyshuari më vonë vrau veten. Ende nuk dihet motivi i plotë i sulmit, ndërsa hetimet vazhdojnë për të zbardhur rrethanat dhe dinamikën e ngjarjes, transmeton Telegrafi.
Incidenti në Minneapolis vjen vetëm pak ditë pas një tjetër përplasjeje me armë në SHBA. Më 29 gusht, një polic u vra dhe një tjetër u plagos gjatë një incidenti në një park në Columbia, Karolina e Jugut. Edhe në atë rast, i dyshuari humbi jetën.
Ndërkohë, më 15 gusht, një person u vra dhe katër të tjerë u plagosën gjatë një tjetër sulmi me armë në një park në Lexington të Kentakit.
Seria e incidenteve ka rikthyer në vëmendje problemin e dhunës me armë në Shtetet e Bashkuara, ndërsa autoritetet vijojnë hetimet për secilin prej rasteve.
