Presidenti ukrainas Volodymyr Zelensky ka deklaruar se Ukraina synon që deri në fund të vitit 2026 të arrijë një pikë barazimi mes territorit të pushtuar nga forcat ruse dhe territorit të rimarrë nga ushtria ukrainase gjatë këtij viti.
Sipas Zelenskyt, që nga fillimi i vitit, forcat ruse kanë marrë nën kontroll rreth 990 kilometra katrorë të territorit ukrainas, ndërsa forcat ukrainase kanë arritur të çlirojnë rreth 820 kilometra katrorë, transmeto nTelegrafi.
“Ne besojmë se gjatë vitit 2026 do të arrijmë një sasi të barabartë të territorit ukrainas të pushtuar përkohësisht nga rusët dhe territorit të çliruar prej nesh”, deklaroi Zelenskyy gjatë një bisede me gazetarë.
Presidenti ukrainas tha gjithashtu se forcat e Kievit kanë rikthyer pothuajse të gjithë territorin e rajonit të Dnipropetrovskut, duke theksuar se kanë mbetur rreth 10 kilometra katrorë për t’u çliruar.
Sipas tij, bëhet fjalë për tri vendbanime të vogla, ku, siç pretendon presidenti ukrainas, aktualisht kanë mbetur shumë pak trupa ruse.
Deklaratat e Zelenskyt vijnë në një periudhë kur luftimet përgjatë vijës së frontit vazhdojnë, ndërsa të dyja palët pretendojnë përparime të ndryshme territoriale.
Zelensky komentoi edhe qëndrimin e presidentit rus Vladimir Putin, duke pretenduar se Kremlini nuk dëshiron t’i japë fund luftës, ndër të tjera për shkak të rënies së mbështetjes politike ndaj tij.
Megjithatë, shifrat e paraqitura nga pala ukrainase lidhen me vlerësimet e Kievit për ndryshimet territoriale dhe mund të jenë subjekt i ndryshimeve apo verifikimeve të mëtejshme të pavarura. /Telegrafi/
