Presidenti i agjencisë Roc Nation Sports, Michael Yormark, ka folur për vendimin e Vinicius Junior për të rinovuar kontratën me Real Madridin, duke i dhënë fund spekulimeve të gjata për të ardhmen e brazilianit.
Vinicius ishte lidhur me një largim nga “Los Blancos”, ndërsa në mesin e klubeve të përfolura ishte edhe Arsenali. Megjithatë, 26-vjeçari në fund vendosi të vazhdojë karrierën në Madrid.
Yormark bëri të qartë se arsyeja kryesore ishte lidhja e fortë e Viniciusit me klubin spanjoll.
“Besoj se vetëm Vini e di këtë, por padyshim që ai zgjodhi të qëndrojë te Real Madridi sepse aty ishte zemra e tij. Aty dëshironte të ishte dhe fatmirësisht gjërat funksionuan”, deklaroi Yormark.
Ai theksoi se Vinicius është jashtëzakonisht i lumtur me vendimin, duke kujtuar se braziliani iu bashkua Real Madridit në moshën vetëm 18-vjeçare dhe ka arritur shumë në një periudhë relativisht të shkurtër.
“Kur mendon për atë që ka arritur që kur iu bashkua klubit në moshën 18-vjeçare, është diçka e jashtëzakonshme. Mendoj se në mendjen e tij ka ende shumë gjëra që dëshiron t’i arrijë”, shtoi ai.
Sipas Yormark, Vinicius dëshiron t’i realizojë këto objektiva pikërisht me Real Madridin, klubin me të cilin është dashuruar gjatë viteve të fundit.
Duke folur për interesimin e Arsenalit, ai pranoi se gjatë negociatave për një rinovim asnjëherë nuk mund të dihet se si do të zhvillohen gjërat.
Megjithatë, Yormark theksoi se Vinicius e kishte vendosur veten në një pozitë ku Real Madridi nuk dëshironte ta humbiste.
“Ai e vendosi veten në një pozitë ku është një lojtar jashtëzakonisht i vlefshëm për Real Madridin. Është një lojtar që një klub si Real Madridi nuk dëshiron ta humbasë dhe ata bënë gjithçka që mundën për ta mbajtur aty”, përfundoi ai./Telegrafi/
