Shefi i arbitrazhit të UEFA-s, Roberto Rosetti, ka thënë se disa kontrolle të VAR-it “nuk kanë të bëjnë fare me futbollin”. Ai e bëri deklaratën pas një takimi me drejtuesit e ligave kryesore të Evropës muajin e kaluar.
Rosetti e bëri vlerësimin e tij në lançimin e portalit “Clear Line”. Është një projekt i hartuar për tifozët, me qëllim përcaktimin e qartë se kur duhet dhe nuk duhet të përdoret VAR-i.
Krerët e organizatave të arbitrimit nga Anglia, Spanja, Gjermania, Franca dhe Italia u takuan me Rosettin dhe drejtorin teknik të IFAB-it, David Elleray, për të provuar të harmonizojnë kriteret e vendimmarrjes.
“Jemi të vetëdijshëm se askush nuk është i kënaqur me ndikimin e VAR-it në futboll për momentin”, ka thënë fillimisht Rosetti.
“Duam të shmangim analizimin e situatave mikroskopike. Konteksti është jashtëzakonisht i rëndësishëm. Ky është futboll, jo PlayStation. Duhet të jemi shumë, shumë të kujdesshëm. Arbitri duhet të arbitrojë ndeshjen. Është e rëndësishme që futbolli të reagojë vetëm ndaj situatave të qarta dhe gabimeve të qarta”.
Rosetti pranoi se do të ishte e vështirë të krijohej një qasje uniforme në të gjitha ligat, pasi secila ka interpretimin e vet të faulleve. Loja me dorë mbetet një problem i veçantë.
Sezonin e kaluar, Liga Premier kishte kriteret më të buta, me një penalizim të dhënë për lojën me dorë mesatarisht çdo 17.27 ndeshje. Në Bundesligë mesatarja ishte 10.93, në La Liga 10.56, në Serie A 10.00 dhe në Ligue 1 9.27 ndeshje. Për krahasim, në Ligën e Kampionëve, një penalizim jepej çdo shtatë ndeshje, më shpesh në Evropë, gjë që konfirmon vështirësinë në harmonizimin e kritereve.
UEFA ka publikuar një seri shembujsh video të lojës me dorë në portalin e saj “Clear Line” për të sqaruar se çfarë konsiderohet shkelje.
“Qëllimi ynë është t’i zbatojmë rregullat në mënyrë më të qëndrueshme. Perceptimi i lojës me dorë në Angli është i ndryshëm. Futbolli nuk është perfekt dhe ndonjëherë do të kemi ende situata të ngjashme me interpretime të ndryshme. Por të paktën po punojmë së bashku”, tha Rosetti.
Dallimet midis Ligës së Kampionëve dhe Ligës Premier pasqyrohen edhe në frekuencën e përdorimit të VAR-it. Në sezonin 2025/2026, Liga Premier pati ndërhyrjet më të pakta në Evropë, me një mesatare prej 0.29 për ndeshje, ndërsa në Ligën e Kampionëve mesatarja ishte 0.47.
Rosetti beson se kontrollet janë të tepërta dhe pretendon se ndërhyrjet e shpeshta ndikojnë në sjelljen e lojtarëve, të cilët përpiqen gjithnjë e më shumë të provokojnë vendimin e teknologjisë video. /Telegrafi/
