Wikipedia po merr një pamje të re jozyrtare që e shndërron në një version nostalgjik të stilit të Windows XP.
Sipas një projekti të ri në internet, faqja e Wikipedia-s paraqitet sikur të ishte një desktop i sistemit operativ Windows XP, duke rikthyer estetikën e njohur të viteve të hershme të kompjuterëve personalë.
Ideja është krijimi i një ndërfaqeje që e bën shfletimin e informacionit më “të prekshëm” dhe më nostalgjik për përdoruesit.
Projekti është realizuar nga një programere dhe e transformon Wikipedia-n në një ambient të ngjashëm me desktopin klasik: artikujt shfaqen si dokumente, ndërsa kategoritë organizohen si dosje (folders).
Në këtë mënyrë, përdoruesi nuk navigon më thjesht përmes një faqeje tradicionale web, por “lëviz” brenda një strukture që i ngjan një sistemi operativ të vjetër.
Faqja hapet me ikona në desktop që përfaqësojnë pjesë të ndryshme të Wikipedia-s dhe shërbimeve të saj. Kategoritë mund të eksplorohen si dosje, ndërsa Wikimedia Commons paraqitet si një bibliotekë skedarësh ku imazhet mund të menaxhohen në mënyrë të ngjashme me një kompjuter të vjetër.
Ky dizajn synon të ofrojë një përvojë ndryshe nga kërkimi tradicional në internet: në vend që përdoruesi të gjejë menjëherë një artikull, ai eksploron më ngadalë përmes strukturave dhe lidhjeve, duke zbuluar përmbajtje që ndoshta nuk do t’i gjente në kërkim normal.
Megjithatë, ky koncept është më shumë eksperimental dhe nostalgjik sesa praktik, pasi nuk synon të zëvendësojë Wikipedia-n klasike, por të ofrojë një mënyrë kreative dhe argëtuese për ta përjetuar atë. /Telegrafi/
