Zulfaj: Nëse Gjykata nuk urdhëron deputetët të jenë në seancë për zgjedhjen e presidentit, vendimet e saj humbin peshë

Zulfaj: Nëse Gjykata nuk urdhëron deputetët të jenë në seancë për zgjedhjen e presidentit, vendimet e saj humbin peshë

Zyrtari nga kabineti i kryeministrit Albin Kurti, Jeton Zulfaj, ka reaguar në lidhje me debatin për mandatin e lirë të deputetëve dhe procesin e zgjedhjes së presidentit në Kosovë.

Përmes një postimi në rrjete sociale, Zulfaj tha se ndonëse mandati i deputetëve është i lirë, vitin e kaluar Gjykata Kushtetuese e Kosovës kishte lëshuar urdhra që deputetët të jenë të pranishëm në seancë dhe të votojnë.

“Për ata që po thonë se mandati i deputetëve është i lirë. Sigurisht, POR gjykata nuk ka pyetur për këtë liri vitin që shkoi. Ka lëshuar urdhra që deputetët të jenë prezentë në seancë dhe të votojnë”, ka shkruar ai.

▶ Lexo edhe këtë

MSH: Disa kompani për kultivimin e kanabisit do të humbasin licencat e punës

Sipas Zulfajt, i njëjti standard duhet të zbatohet edhe në situatën aktuale lidhur me vazhdimin e seancës për zgjedhjen e presidentit.

Ai theksoi se nëse Gjykata Kushtetuese nuk vendos që seanca të vazhdojë aty ku ka mbetur, duke i urdhëruar deputetët të jenë të pranishëm dhe të votojnë “për”, “kundër” apo “abstenim”, atëherë vendimet e saj rrezikojnë të humbin peshën dhe autoritetin.