Një rast i pazakontë me një Lincoln Aviator të vitit 2021 dëshmon se neglizhimi i mirëmbajtjes mund të shkatërrojë edhe motorët modernë me teknologji të avancuar.
Mosndërrimi i rregullt i vajit mund të shkaktojë dëme serioze në motor dhe të sjellë shpenzime të mëdha për pronarët e automjeteve. Këtë e dëshmon rasti i një Lincoln Aviator të vitit 2021, i pajisur me motorin 3.0-litërsh V6 EcoBoost me dy turbombushës, vaji i të cilit ishte ndërruar vetëm dy herë gjatë 112.600 kilometrave të përshkuara.
Çmontimi i motorit u publikua nga Eric Berg, në kanalin e tij në YouTube, “I Do Cars”, pasi ai kishte blerë veturën dhe kishte zbuluar historikun e dobët të mirëmbajtjes.
Gjatë hapjes së motorit, u vërejtën depozitime të mëdha të vajit të degraduar, të cilat kishin mbuluar pjesët e brendshme të tij. Edhe valvulat elektromagnetike të sistemit të ndryshimit të kohës së hapjes së valvulave ishin mbushur me mbetje dhe depozitime nga kushinetat.
– YouTube www.youtube.com
Gjendja ishte edhe më shqetësuese pas heqjes së kapakut të mekanizmit të shpërndarjes, ku në fund të motorit u zbulua një grumbullim i madh i materialit me ngjyrë të argjendtë dhe konsistencë të trashë.
“Kam parë motorë me 390.000 apo 470.000 kilometra që duken 10 mijë herë më mirë se ky”, deklaroi Berg gjatë analizës.
Dëmi më i madh ishte konstatuar te kushineta e cilindrit të gjashtë, e cila kishte dështuar plotësisht dhe ishte rrotulluar në vendin e saj. Megjithatë, boshti motorik duket se nuk kishte pësuar dëmtime të mëdha, ndërsa Berg vlerësoi se edhe blloku i motorit mund të jetë ende i ripërdorshëm.
Pavarësisht gjendjes së rëndë, eksperti vlerësoi se motori kishte rezistuar më gjatë sesa mund të pritej në kushte të tilla.
Ky rast është një tjetër dëshmi se mirëmbajtja e rregullt nuk duhet neglizhuar. Vaji i motorit luan rol thelbësor në lubrifikimin, ftohjen dhe mbrojtjen e pjesëve mekanike nga konsumimi.
Kursimi nga ndërrimi i vajit mund të duket i vogël në fillim, por pasojat mund të jenë shumë më të kushtueshme, deri në nevojën për riparim të madh ose zëvendësim të plotë të motorit. /Telegrafi/