Pesë problemet që njerëzit përmendin më shpesh në psikoterapi lidhen me vetëvlerësimin, krahasimin me të tjerët, humbjen, vetminë dhe mungesën e motivimit.
Ekspertët theksojnë se shumë prej këtyre vështirësive janë më të përhapura nga sa mendohet dhe se njerëzit nuk janë të vetëm në përvojat e tyre.
Një nga shqetësimet më të zakonshme është ndjesia se diçka nuk shkon me veten. Shumë persona e shohin veten si të dëmtuar emocionalisht, ndërsa terapistët shpjegojnë se këto ndjenja mund të lidhen me përvoja të vështira dhe trauma të mëparshme.
Vetëdhembshuria dhe pranimi i emocioneve konsiderohen hapa të rëndësishëm drejt përmirësimit.
Një tjetër problem është bindja se po mbeten prapa në jetë. Krahasimi i vazhdueshëm me të tjerët, veçanërisht përmes rrjeteve sociale, mund të ndikojë negativisht në vetëvlerësim dhe të lidhet me nivele më të larta ankthi dhe depresioni.
Në terapi diskutohet shpesh edhe vështirësia për të përballuar humbjen e një personi të dashur. Presioni për t’u rikthyer shpejt në normalitet mund ta bëjë procesin e zisë edhe më të vështirë, pasi secili e përjeton humbjen në mënyrën dhe ritmin e vet.
Ndërkohë, vetmia mbetet një shqetësim i përhapur, edhe te njerëzit që janë të rrethuar nga të tjerët.
Problemi i pestë është mungesa e vazhdueshme e motivimit, e cila mund ta vështirësojë përqendrimin dhe përmbushjen e detyrave të përditshme.
Ekspertët sugjerojnë që pritshmëritë jorealiste ndaj vetes të zëvendësohen me hapa më të vegjël dhe objektiva të arritshëm. Kur mungesa e motivimit pengon edhe kujdesin bazë për veten, mund të jetë e nevojshme ndihma e një profesionisti të shëndetit mendor. /Telegrafi/
