Asociacioni i Gazetarëve të Kosovës ka reaguar pas një incidenti gjatë protestës para ndërtesës së Kuvendit të Kosovës, ku sipas AGK-së është penguar në kryerjen e detyrës gazetari Jeton Sopa nga KosovaNews.
Sipas njoftimit të AGK-së, Sopa është shtyrë fizikisht nga disa persona derisa po raportonte nga protesta, në kohën kur në Kuvend po mbahej seanca e jashtëzakonshme.
AGK-ja ka shprehur shqetësim për rastin dhe e ka dënuar sulmin fizik ndaj gazetarit.
“AGK-ja u bën thirrje të gjitha palëve të përfshira në ngjarjet e sotme që të respektojnë punën e ekipeve mediale dhe të mos e pengojnë atë në asnjë mënyrë”, thuhet në reagimin e Asociacionit të Gazetarëve të Kosovës.
AGK-ja ka kërkuar që gazetarët dhe ekipet mediale të mund ta kryejnë punën e tyre pa pengesa dhe presion gjatë raportimit nga protestat dhe ngjarjet publike. /Telegrafi/
