Empire State Building u ndriçua me një shkëlqim rozë mbrëmjen e së martës, në nder të ikonës së muzikës country Dolly Parton, e cila ndërroi jetë në moshën 80-vjeçare.
Ndriçimi special u bë nga ora 21:25 deri në 22:25, si dedikim për jetën dhe trashëgiminë e artistes.
Zgjedhja e orës 21:25 nuk ishte e rastësishme.
Ajo ishte një referencë e drejtpërdrejtë për një prej këngëve më të famshme të Parton, “9 to 5”, e cila u publikua në vitin 1980 dhe u bë një nga hitet më të njohura të karrierës së saj.
Në njoftim, Empire State Building e cilësoi Dolly Parton si një ikonë globale të kulturës, karriera e së cilës zgjati rreth shtatë dekada dhe preku breza të tërë fansash.
Në të njëjtën kohë, u vu në pah edhe puna e saj humanitare, veçanërisht përmes Dollywood Foundation dhe Imagination Library, programi që ka shpërndarë qindra miliona libra për fëmijë në mbarë botën.
Vdekja e Parton ka shkaktuar reagime të shumta në Shtetet e Bashkuara dhe në mbarë botën.
Artistja la pas një karrierë të jashtëzakonshme si këngëtare, kompozitore dhe aktore, me këngë të paharrueshme si “Jolene”, “9 to 5” dhe “I Will Always Love You”.
Përveç muzikës, ajo u bë e njohur edhe për veprimtarinë e saj bamirëse dhe ndikimin që pati në arsim dhe në komunitete të ndryshme. /Telegrafi/
