Një koalicion i udhëhequr nga Arabia Saudite, që lufton kundër rebelëve Houthi të mbështetur nga Irani, njoftoi të hënën se po zhvillohej një fushatë ajrore kundër rebelëve në Jemen, përgjatë bregdetit të Detit të Kuq.
Njoftimi erdhi menjëherë pasi rebelët thanë se kishin marrë nën kontroll më shumë territor në pjesën jugperëndimore të Jemenit, duke pushtuar një qytet kyç – një goditje kjo për forcat e mbështetura nga Arabia Saudite – ndërsa avanconin drejt një kryeqyteti strategjik provincial në rajon.
Zëdhënësi i koalicionit të udhëhequr nga Arabia Saudite, gjeneral-majori Turki al-Malki, tha se 100 avionë luftarakë po u ofronin mbështetje forcave të qeverisë së Jemenit, të njohur ndërkombëtarisht, që po luftojnë kundër Houthi-ve.
Ai tha se koalicioni ka siguruar “mbrojtje ajrore” për ngushticën strategjike Bab el-Mandeb dhe ka shkatërruar qindra objektiva të Houthi-ve si pjesë e fushatës në vazhdim.
Fushata dhe detajet e saj nuk mund të verifikoheshin menjëherë në mënyrë të pavarur.
Fushata ajrore pason rënien e një qyteti kyç në Jemen.
Rebelët Houthi morën nën kontroll qytetin Turbah të dielën, pak para se qeveria e njohur ndërkombëtarisht të njoftonte një operacion të madh ushtarak kundër tyre.
Përshkallëzimi i tensioneve midis Arabisë Saudite dhe Houthi-ve ka ringjallur luftën civile në Jemen pas një armëpushimi katërvjeçar.
Turbah ndodhet në një rrugë kryesore që lidh kryeqytetin provincial Taiz me qytetin portual Aden, i cili shërben si selia e përkohshme e qeverisë së Jemenit.
Ndër vite, qyteti ka qenë një pikë e rëndësishme për forcat qeveritare që mbronin Taizin kundër Houthi-ve.
Më herët, Houthi-t pushtuan disa fshatra dhe zona në periferi të Taizit në një seri avancimesh, duke u hapur rrugën rebelëve për të rrethuar Taizin, qytetin e tretë më të madh të Jemenit. /Telegrafi/
