Pavarësisht se shënoi mbi 70 gola gjatë sezonit 2025/26, kandidatura e ish-sulmuesit të Tottenhamit për çmimin prestigjioz nuk i ka bindur të gjithë.
Të hënën, Londra do të jetë nikoqire e ceremonisë së Topit të Artë për herë të parë, ku emra të mëdhenj të futbollit do të mblidhen për të vlerësuar arritjet e 12 muajve të fundit.
Pavarësisht numrit gjithnjë e më të madh të çmimeve që do të ndahen, vëmendja kryesore mbetet te fituesi i Topit të Artë për meshkuj. Në vitin 2026, gara është veçanërisht e hapur, me pesë deri në dhjetë futbollistë që mund të konsiderohen kandidatë të denjë për çmimin më prestigjioz individual në futboll.
Megjithatë, secili prej favoritëve ka edhe dobësitë e veta, duke e bërë këtë garë ndër më të hapurat dhe më të diskutueshmet e dekadave të fundit. Epoka e dominimit të Lionel Messit dhe Cristiano Ronaldos ka përfunduar, ndërsa tashmë shumë futbollistë besojnë se mund ta fitojnë çmimin.
Por, të jesh futbollisti më i mirë në botë nuk është domosdoshmërisht e njëjta gjë me të qenit lojtari që e meriton më së shumti Topin e Artë. Dhe pikërisht këtu qëndron argumenti në favor të Harry Kane.
Statistika mbresëlënëse
Debati nëse Topi i Artë duhet t’i jepet futbollistit më të mirë në botë apo atij që ka pasur sezonin më të mirë vazhdon prej vitesh. Në praktikë, çmimi shpesh shkon te lojtari që ka shkëlqyer individualisht dhe ka ndihmuar skuadrën të fitojë trofe të rëndësishëm.
Megjithatë, sezoni i Kane me Bayern Munichun ishte i jashtëzakonshëm për nga statistikat. Sulmuesi anglez shënoi 73 gola në 65 paraqitje për klubin dhe kombëtaren gjatë sezonit 2025/26.
Prej tyre, 36 gola i realizoi në kampionat, me një mesatare prej një goli çdo 66 minuta, duke ndihmuar Bayernin ta fitonte titullin e Bundesligës. Ai shënoi gjithashtu në çdo raund të Kupës së Gjermanisë, duke realizuar dhjetë gola në gjashtë ndeshje, përfshirë një het-trik vendimtar në finale.
Në Ligën e Kampionëve, Kane shënoi 14 gola në 13 ndeshje, përfshirë gola në të pesë ndeshjet e fazës eliminatore në të cilat u paraqit, ndërsa Bayerni arriti deri në gjysmëfinale.
Me Përfaqësuesen e Anglisë, ai ishte kapiten në Kupën e Botës 2026, ku kombëtarja angleze përfundoi në vendin e tretë, rezultatin më të mirë të saj në një Botëror të zhvilluar jashtë Anglisë. Kane shënoi gjashtë gola, përfshirë realizime vendimtare në dy raunde eliminatore.
Vetëm Lionel Messi, me 73 gola në sezonin 2011/12, ka shënuar më shumë se Kane brenda një sezoni gjatë shekullit XXI. Edhe pse anglezi nuk i fitoi dy trofetë më të rëndësishëm, Liga e Kampionëve dhe Kupa e Botës, paraqitjet e tij ndihmuan Bayernin dhe Anglinë të luftonin deri në fazat e avancuara të garave.
Kontributi përtej golave
Kane nuk është vetëm një sulmues që pret topin brenda zonës për të shënuar. Përveç aftësive të jashtëzakonshme para portës, ai është ndër sulmuesit më të kompletuar të gjeneratës së tij.
Gatishmëria për t’u tërhequr më thellë në fushë, për të organizuar aksione, për të shpërndarë pasime dhe për të krijuar hapësira për bashkëlojtarët e bëjnë atë një lojtar të veçantë.
Tetë asistimet e tij gjatë sezonit nuk e pasqyrojnë plotësisht kontributin në lojën krijuese. Vetëm për Bayernin, Kane krijoi 26 raste të mëdha shënimi në të gjitha garat.
Aftësia e tij për të krijuar hapësira ka qenë e rëndësishme për mënyrën se si luajnë skuadrat e drejtuara nga Vincent Kompany dhe Thomas Tuchel. Kjo ka ndihmuar edhe futbollistët e krahëve dhe mesfushorët që depërtojnë në zonë.
Një garë e hapur
Pavarësisht sezonit të jashtëzakonshëm, ekziston mundësia që Kane të mos e fitojë Topin e Artë. Gara është shumë e hapur dhe votat mund të ndahen mes disa kandidatëve.
Disa votues mund të zgjedhin Lamine Yamalin, ndërsa të tjerë mund të favorizojnë Kylian Mbappén, i cili shënoi afro 60 gola për Real Madridin dhe Francën, si dhe fitoi Këpucën e Artë të Botërorit, megjithëse skuadrat e tij nuk arritën të fitonin trofe.
Paraqitjet e Lionel Messit në Kupën e Botës kanë rikthyer gjithashtu diskutimet për vendin e tij mes futbollistëve më të mirë në botë. Ndërkohë, Khvicha Kvaratskhelia mund të përfitojë nga paraqitjet e shkëlqyera në fazën eliminatore të Ligës së Kampionëve me Paris Saint-Germainin.
Edhe Rodri dhe Michael Olise mund të jenë në garë, për arsye të ndryshme. Kjo rrit rrezikun që votat të ndahen mes futbollistëve me argumente të forta për çmimin.
Fushatë më e heshtur
Një tjetër faktor që mund ta dëmtojë kandidaturën e Kane është mungesa e një fushate të fuqishme publike në mbështetje të tij. Barcelona dhe Real Madridi kanë promovuar kandidaturat e Yamalit dhe Mbappés, ndërsa edhe Messi ka marrë mbështetje nga bashkëlojtarët e tij në Argjentinë.
Trajneri i Bayernit, Vincent Kompany, kur u pyet nëse Kane apo Olise duhet ta fitonte çmimin, deklaroi se nuk e kishte Topin e Artë në mendje çdo ditë, duke theksuar se për të ishte më e rëndësishme që Bayerni të fitonte trofe.
Edhe vetë Kane ka qenë i rezervuar kur është pyetur për çmimin. Në një intervistë për “Marca” në shtator, ai e përshkroi sezonin e kaluar si më të mirin e karrierës së tij.
“Është e vërtetë që përfundimi i sezonit me 73 gola, shifra e dytë më e lartë në histori, flet vetë. Jam jashtëzakonisht krenar për këtë. Mund vetëm t’i falënderoj bashkëlojtarët dhe të gjithë ata që më ndihmuan ta arrija këtë”, kishte deklaruar Kane.
Përulësia e tij mund të jetë një nga arsyet pse nuk ka arritur të krijojë të njëjtin ndikim publik dhe komercial si disa nga rivalët. Për më tepër, disa votues mund të mos i vlerësojnë golat në Bundesligë njësoj si ata në Ligën Premier apo La Liga, ndërsa 19 nga realizimet e tij erdhën nga pika e bardhë.
Megjithatë, Kane ka dëshmuar në fushë se është ndër futbollistët më të mirë të brezit të tij dhe se ka argumente të forta për ta fituar Topin e Artë.
Nëse votuesit do ta shpërblejnë për sezonin e jashtëzakonshëm, do të mësohet të hënën, në ceremoninë që mbahet në qytetin e tij, Londër. Nëse ai nuk e fiton çmimin, do të jetë e arsyeshme të shtrohet pyetja se çfarë tjetër mund të kishte bërë për ta merituar atë. /Telegrafi/
