Gjermania reformon shërbimet sekrete, BND-së i jepen kompetenca të reja

Gjermania ka miratuar një paketë të gjerë ligjore që synon të heqë kufizimet e vendosura ndaj shërbimeve të saj të inteligjencës pas Luftës së Dytë Botërore. Reforma shënon një ndryshim të madh në politikën e sigurisë së Berlinit, pas një sërë sulmesh dhe incidentesh të fundit.

Ministri i Brendshëm, Alexander Dobrindt, e ka cilësuar reformën të domosdoshme për ndryshimin e mënyrës së operimit të shërbimeve. “Po i shndërrojmë shërbimet tona të inteligjencës në shërbime të vërteta sekrete”, deklaroi ai.

Lexo edhe nga Bota

Për herë të parë, shkencëtarët krijojnë viruse me inteligjencë artificiale Shkencëtarët kanë përdorur për herë të parë inteligjencën artificiale për të krijuar forma të reja virusesh që nuk...

Sipas projektligjit, shërbimi i inteligjencës së jashtme BND do të ketë kompetenca më të mëdha, përfshirë autorizimin për sulme kibernetike hakmarrëse dhe manipulimin ose fshirjen e të dhënave të kundërshtarëve, shkruan theguardian.

BND-së do t’i lejohet gjithashtu të ndërpresë transferta financiare drejt operativëve të huaj dhe të sabotojë prodhimin e armëve përmes ndryshimit të planeve teknike. Drejtori Martin Jäger tha se Gjermania duhet t’u tregojë Rusisë, Kinës dhe kundërshtarëve të tjerë se mund të kundërpërgjigjet.

Ndërkohë, personeli gjerman i inteligjencës i vendosur jashtë vendit do të përballet me më pak pengesa për mbajtjen e armëve të zjarrit për qëllime mbrojtëse. Megjithatë, përdorimi i forcës vdekjeprurëse për operacione sulmuese do të mbetet i ndaluar.

Edhe inteligjenca e brendshme do të fitojë kompetenca më të mëdha. Inteligjenca artificiale do të përdoret për mbledhjen dhe analizimin e të dhënave, ndërsa do të ulen kriteret për mbikëqyrjen e banesave dhe komunikimeve online.

Reforma ka shkaktuar shqetësime te mbrojtësit e lirive civile. Komisionerja federale për mbrojtjen e të dhënave, Louisa Specht-Riemenschneider, paralajmëroi se zgjerimi i mbikëqyrjes nuk shoqërohet me kontroll të mjaftueshëm, ndërsa të Gjelbërit kritikuan ndërthurjen e kompetencave të policisë dhe inteligjencës.

Qeveria e Friedrich Merzit e konsideron reformën thelbësore për forcimin e sigurisë përballë pasigurisë gjeopolitike dhe dyshimeve për rolin e SHBA-së si garantuese e sigurisë. Projektligji duhet të miratohet nga parlamenti dhe mund t’i nënshtrohet shqyrtimeve gjyqësore para zbatimit të planifikuar në fillim të vitit 2027. /Telegrafi/