Ish-mbrojtësi i Manchester Cityt, Micah Richards ka folur publikisht për herë të parë që kur klubi u shpall fajtor për shkelje të rregullave financiare të Ligës Premier. Richards, i cili fitoi titullin e Ligës Premier me Cityn në vitin 2012, pranoi se vendimi e kishte goditur rëndë.
City u shpall fajtor për 114 nga 115 akuzat kundër tyre pas një gjyqi të gjatë para një paneli të pavarur, që mbulonte sezonet nga 2008/09 deri në 2017/18. Liga Premier tha se klubi përdori kontrata fiktive dhe marrëveshje mashtruese për të rritur artificialisht të ardhurat dhe për të ulur kostot.
Paneli gjithashtu zbuloi se disa nga dëshmitarët kryesorë të klubit kishin dhënë deklarata të rreme dhe të pandershme.
Richards foli për të gjithë këtë çështje në podcastin The Rest is Football, duke thënë se do të vdiste për klubin nga Etihad.
“Raportet ishin shqetësuese. Pashë kushtet që përdorte Liga Premier, si kontrata fiktive, dhe u ndjeva absolutisht i shkatërruar. Kam qenë në këtë klub që kur isha 14 vjeç, do të vdisja për këtë klub. E kam përmbushur ëndrrën time te Manchester City dhe pastaj dëgjon raporte të tilla. Dhe jo vetëm unë si ish-lojtar, por edhe tifozët, ajo që po kalojnë tani. Absolutisht shkatërruese”, ka thënë fillimisht Richards.
Shkeljet financiare lidhen me modele të dyshuara të financimit të fshehtë me partnerë komercialë me vlerë më shumë se një miliard euro. Komisioni arriti në përfundimin se këto marrëveshje sponsorizimi nuk pasqyronin vlerën e tyre reale ekonomike dhe se në këtë mënyrë u shkel integriteti i garës.
Richards tha se ndjeu një përzierje trishtimi, zemërimi dhe konfuzioni, por kujtoi se City ende e ruan pafajësinë e tij.
“Nuk ka fitues këtu. Nëse City apelon dhe arrin ta përmbysë vendimin, njolla do të mbetet ende. Dhe nëse ai shpallet fajtor pas apelimit, çfarë do të ndodhë më pas? Dhe nuk janë vetëm tifozët apo lojtarët e Cityt. E gjithë Liga Premier është në lojë. Kjo mund të vazhdojë për vite me radhë”, përfundoi Richards, i cili tani është një nga analistët e preferuar të futbollit. /Telegrafi/
