Franz von Holzhausen, shefi i dizajnit të Tesla-s prej 18 vitesh, ka vendosur të ruajë një prej modeleve më të veçanta të prodhuara nga kompania – Model S Plaid Signature Edition me numër shasie 001, i pari nga vetëm 250 ekzemplarë të këtij edicioni të kufizuar.
Në vend që ta modifikojë për të rritur performancën, von Holzhausen e ka dërguar makinën në një qendër të specializuar në Kaliforni për një proces të plotë mbrojtjeje dhe konservimi. Automjeti ka një çmim fillestar prej rreth 159,420 dollarësh dhe është ofruar vetëm përmes ftesave të dërguara klientëve të përzgjedhur.
Modeli i tij është veçanërisht unik për shkak të ngjyrës Garnet Red, e krijuar si homazh ndaj ngjyrës së kuqe origjinale të versionit Signature të Model S, kur modeli u prezantua për herë të parë në vitin 2012.
Në pjesën e jashtme, makina dallohet edhe nga detajet e arta, përfshirë logot dhe kaliprat e frenave. Ndërkohë, kabina është e veshur me lëkurë të bardhë dhe është pajisur me timonin karakteristik yoke.
Pavarësisht pamjes së veçantë, nën karroceri qëndron konfigurimi i fuqishëm me tre motorë elektrikë, i cili prodhon rreth 1,020 kuaj fuqi dhe 1,050 lb-ft çift rrotullues. Tesla deklaron një përshpejtim nga 0 në 100 kmh për vetëm 1.99 sekonda, ndërsa me Track Package makina mund të arrijë deri në 322 km/h.
Por ajo që e bën këtë automjet edhe më interesant është mënyra se si është trajtuar pas daljes nga fabrika, transmeton Telegrafi.
Specialistët e Unplugged Performance nuk kanë ndërhyrë në motorë apo në sistemin e performancës. Në vend të kësaj, makina iu nënshtrua një procesi të plotë pastrimi dhe dekontaminimi, përpara se të mbulohej me film mbrojtës të bojës (PPF) në të gjithë karrocerinë.
Mbi këtë shtresë është aplikuar edhe një veshje qeramike, e cila përfshin pjesët e lyera dhe sipërfaqet e rrotave. Edhe xhamat janë trajtuar me një film të posaçëm për mbrojtje nga rrezet ultraviolet dhe reduktim të nxehtësisë në kabinë.
Model S Plaid Signature Edition nuk është i vetmi model i kufizuar i këtij cikli. Tesla prodhoi gjithashtu 100 ekzemplarë të Model X Plaid Signature Edition, ndërsa të dyja seritë u dorëzuan gjatë një aktiviteti në fabrikën e Fremont në maj 2026.
Vendimi i von Holzhausen për të ruajtur dhe jo modifikuar Model S Plaid nr. 001 është domethënës. Për një prej njerëzve që ka ndikuar më shumë në dizajnin e automjeteve Tesla gjatë gati dy dekadave, kjo makinë duket se është tashmë më shumë se një automjet i fuqishëm – është një pjesë e historisë së markës, e destinuar për t’u ruajtur siç doli nga fabrika. /Telegrafi/
