David Silva po përgatitet për një rikthim të bujshëm në futboll, tri vjet pasi i dha fund karrierës profesionale.
Legjenda e Manchester Cityt dhe ish-reprezentuesi i Spanjës ka nënshkruar kontratë afatshkurtër me skuadrën Supreme Shatin nga Hong Kongu, duke vendosur të rikthehet në fushë në moshën 40-vjeçare.
Silva e kishte mbyllur karrierën në vitin 2023, kur ishte pjesë e Real Sociedadit. Që nga atëherë, spanjolli kishte qëndruar jashtë futbollit profesionist, por tash ka vendosur t’i rikthehet lojës në një aventurë krejtësisht të re.
Supreme Shatin, që garon në Premier League të Hong Kongut, ka bërë të ditur transferimin e tij, ndërsa pritet që Silva të debutojë gjatë muajit të ardhshëm.
Rikthimi i tij pritet të tërheqë vëmendje të madhe, jo vetëm në Hong Kong, por edhe në futbollin evropian, për shkak të karrierës së jashtëzakonshme që spanjolli ndërtoi gjatë më shumë se dy dekadave.
Silva ishte një prej figurave kryesore të epokës së artë të Manchester Cityt, ku luajti nga viti 2010 deri më 2020. Me klubin anglez fitoi katër tituj të Premier Leagues, dy FA Cup, pesë League Cup dhe tre Community Shield.
Ai e nisi karrierën te Valencia, ndërsa më pas luajti i huazuar te Eibar dhe Celta Vigo, para se të rikthehej në Valencia dhe të transferohej në Manchester City.
Pas një dekade në Angli, Silva vazhdoi karrierën në Spanjë te Real Sociedad, ku edhe e zhvilloi ndeshjen e fundit si futbollist profesionist në vitin 2023.
Me kombëtaren e Spanjës, Silva zhvilloi 125 paraqitje dhe shënoi 35 gola. Ai ishte pjesë e skuadrës që fitoi Kampionatin Evropian në vitin 2008 dhe Kupën e Botës në vitin 2010.
Tash, pas tri vitesh larg futbollit profesionist, një prej mesfushorëve më elegantë të gjeneratës së tij do ta provojë veten në një kapitull krejtësisht të ri të karrierës. /Telegrafi/
