Bashkimi Evropian ka hequr përmendjen e “anëtarësimit të asociuar” nga draft-deklarata e përbashkët me Kanadanë, pas kundërshtimeve të Gjermanisë. Në vend të tij, është propozuar formulimi “partneritet gjithnjë e më i ngushtë”, që synon thellimin e bashkëpunimit pa e çuar Kanadanë drejt anëtarësimit të plotë në BE.
Ndryshimi është bërë në versionin e fundit të dokumentit që pritet të miratohet në përfundim të samitit BE–Kanada, i cili mbahet të enjten dhe të premten në Montreal, transmeton Telegrafi.
Propozimi fillestar për anëtarësim të asociuar ishte përfshirë në një version të rishikuar të dokumentit, të shpërndarë mes vendeve anëtare të mërkurën me insistimin e Gjermanisë. Pas negociatave intensive të zhvilluara gjatë orëve të fundit nga zyra e presidentit të Këshillit Evropian, António Costa, me disa shtete anëtare, formulimi u zëvendësua me zotimin për një afrim gjithnjë e më të madh mes BE-së dhe Kanadasë.
Presidentja e Komisionit Evropian, Ursula von der Leyen, e kishte hedhur si ide krijimin e statusit të anëtarësimit të asociuar gjatë fjalimit të saj për gjendjen e Unionit në Parlamentin Evropian muajin e kaluar, duke e ftuar Kanadanë të bëhej vendi i parë me këtë status.
– YouTube www.youtube.com
Megjithatë, drafti i mëparshëm, i paraqitur të martën përmes procedurës së heshtur, hasi në kundërshtime nga Gjermania, Franca, Italia dhe Greqia. Sipas kësaj procedure, dokumenti konsiderohet i miratuar nëse asnjë shtet anëtar nuk paraqet kundërshtim të qartë.
Gjermania ka qenë kundërshtarja më e zëshme e përdorimit të termit “anëtarësim i asociuar”. Kancelari Friedrich Merz kishte propozuar më herët një status të ngjashëm për Ukrainën, si mënyrë për t’i ofruar Kievit garanci sigurie përpara anëtarësimit të plotë në Bashkimin Evropian.
Për Berlinin, përparësi ka përcaktimi konkret i mënyrave të bashkëpunimit më të ngushtë me Otavën, në vend që marrëveshja të përkufizohet përmes një termi që nuk figuron në traktatet e BE-së dhe që mund të sjellë pasoja të rëndësishme ligjore.
Kryeministri kanadez, Mark Carney, ka mbështetur formulimin “aleancë për të ardhmen”, duke theksuar se dëshiron që vëmendja të përqendrohet te përmbajtja e marrëveshjes, ndërsa terminologjia duhet të përcaktohet nga vetë Bashkimi Evropian.
Versioni i fundit i deklaratës është paraqitur sërish përmes procedurës së heshtur dhe pritet të miratohet, përveç nëse ndonjë vend anëtar kundërshton tekstin gjatë pasdites. /Telegrafi/
