Alarm në Gjermani dhe Zvicër, gjenden gjilpëra dhe magnetë në ëmbëlsirat e Halloween-it, policia nis hetimet

Festa e Halloween-it është shoqëruar me shqetësime në Gjermani dhe Zvicër, pasi disa fëmijë kanë zbuluar objekte metalike të rrezikshme brenda ëmbëlsirave të mbledhura gjatë festës.

Në disa raste janë gjetur gjilpëra metalike dhe magnetë, ndërsa një baba në Zvicër ka raportuar se vajza e tij kishte gjetur një vidë brenda një karameleje.

Sipas mediumit zviceran Blick, policia në Wintzingerode të Gjermanisë ka nisur hetimet pas zbulimit të gjilpërave metalike në disa ëmbëlsira të Halloween-it.

Dyshohet se objektet janë vendosur qëllimisht brenda tyre, ndërsa rasti po hetohet si tentativë për shkaktim të lëndimeve të rënda trupore, transmeton Telegrafi.

Lexo edhe nga Bota

Një vajzë 8-vjeçare në gjendje të rëndë, pasi u sulmua nga një ujk në një kopsht zoologjik në Gjermani Një vajzë 8-vjeçare u sulmua nga të paktën një ujk brenda hapësirës së kafshëve në një kopsht zoologjik...

Një tjetër incident është raportuar në Appenheim, në landin gjerman Rheinland-Pfalz, ku një djalë nëntëvjeçar ka gjetur dy magnetë të vegjël të ngjitur në një karamele të butë.

Për fat të mirë, fëmija nuk është lënduar, pasi nëna e tij e kishte paralajmëruar që t’i kontrollonte ëmbëlsirat përpara se t’i konsumonte.

Në një rast tjetër, në Zvicër, një baba nga Schönenwerd ka paralajmëruar prindërit pasi vajza e tij, e cila kishte dalë për të mbledhur ëmbëlsira së bashku me një shoqe, ka gjetur një vidë metalike brenda një karameleje.

Babai ka publikuar fotografinë e objektit në rrjetet sociale, duke kërkuar nga familjet e tjera që të tregojnë kujdes.

Megjithatë, deri më tani, ky rast nuk është konfirmuar zyrtarisht dhe nuk dihet nëse objekti është vendosur qëllimisht.

Ndërkohë, policia gjermane ka apeluar te prindërit që të kontrollojnë me kujdes të gjitha ëmbëlsirat e mbledhura nga fëmijët përpara konsumimit.

Autoritetet këshillojnë që produktet me ambalazh të dëmtuar ose me përmbajtje të dyshimtë të mos konsumohen dhe rastet e tilla të raportohen menjëherë në polici.

Nga ana tjetër, policia ka dhënë një sqarim të rëndësishëm për rastin e magnetëve në Appenheim.

Pas hetimeve të mëtejshme, është konstatuar se magnetët kishin përfunduar në karamele aksidentalisht dhe nuk kishte prova për ndërhyrje kriminale nga persona të tretë. Ndërsa hetimet për gjilpërat metalike të gjetura në Thüringen vazhdojnë./Telegrafi/