Aktori amerikan, James Handy, i njohur për rolet e tij në filmat “Top Gun: Maverick” dhe “Jumanji”, është gjetur i therur për vdekje në Los Angeles, sipas autoriteteve lokale.
Policia e Los Angeles-it ka arrestuar 44-vjeçarin Michael Gledhill, djalin e të dashurës së aktorit, si të dyshuar për vrasjen e tij.
Ngjarja ndodhi pasi forcat e rendit iu përgjigjën një thirrjeje emergjente në një banesë, ku një person kishte raportuar në 911: “Unë jam biri i njeriut, sapo vrava njeriun e mëkatit”, sipas raportimeve të policisë, shkruan CNN.
Kur mbërritën në vendngjarje, oficerët e gjetën 81-vjeçarin Handy në oborrin e shtëpisë me plagë të rënda në gjoks dhe pa ndjenja. Ai u dërgua me urgjencë në spital, por më vonë u konstatua i vdekur.
I dyshuari, i cili jetonte në të njëjtën banesë me nënën e tij dhe aktorin, u vetëdeklarua para policisë si personi i kërkuar. Ai është arrestuar nën akuzën e vrasjes dhe i është caktuar një garanci prej 2 milionë dollarësh (rreth 1.85 milionë euro).
James Handy, i lindur në New York, ka pasur një karrierë në film dhe televizion, duke u bërë i njohur sidomos për rolin e tij si “shfarosës” në “Jumanji” (1995) dhe si baristi Jimmy në “Top Gun: Maverick” (2022).
Ai ka marrë pjesë gjithashtu në disa seriale të njohura kriminale si “NCIS: Los Angeles”, “The Closer” dhe “Cold Case”.
Agjencia e talenteve Ellis Talent Group ka shprehur dhimbje për humbjen e tij, duke e përshkruar Handy si “një klient dhe mik jashtëzakonisht të talentuar, të përulur dhe të sjellshëm”. /Telegrafi/
