Deputeti i Lëvizjes Vetëvendosje, Agim Bahtiri, në tetorin e vitit të kaluar kishte thënë se e pret dorën më përpara sesa që e voton kandidatin e Listës Serbe për nënkryetar.
Në hyrje të objektit të Kuvendit, Bahtiri insistonte që Rashiq është i preferuari i Lëvizjes Vetëvendosje.
“Sigurisht që Rashiqi do të zgjidhet. E kam deklaruar edhe më herët, e pres dorën dhe nuk e votojë Listën Serbe. Kështu e kanë mendimin edhe kolegët e mi të LVV-së. Kjo është e bazuar në problemet që i kanë bërë në veri. Nuk I votoj njerëzit që kokën e kanë në Beograd e trupin në Prishtinë”, kishte thënë Bahtiri.
Megjithatë pesë muaj pas, Agim Bahtiri, bashkë me kolegët e tij në Lëvizjen Vetëvendosje të pranishëm në sallën e Kuvendit të Kosovës kanë votuar edhe për zgjedhjen e Slavko Simicit për nënkryetar, në pako bashkë me katër nënkryetarët e tjerë.
