Presidentja e Kosovës, Justina Shiroka-Pula, ka marrë vendim që ta kthejë në Kuvend për rishqyrtim Ligjin për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.
Vendimi është marrë të enjten, më 22 tetor, pasi presidentja ka pranuar propozimin zyrtar të Grupit Parlamentar të Partisë Demokratike të Kosovës (PDK), si sponsorizuese e ligjit, për t’i dhënë Kuvendit mundësinë e rishqyrtimit të disa dispozitave.
Sipas njoftimit të Presidencës, rishqyrtimi do të përqendrohet veçanërisht në dispozitat që lidhen me juridiksionin dhe mandatin e Dhomave të Specializuara, si dhe në garantimin e plotë të të drejtave kushtetuese të personave që po gjykohen në Hagë.
Në arsyetimin e vendimit, presidentja Shiroka-Pula ka theksuar sakrificën, angazhimin dhe kontributin e Ushtrisë Çlirimtare të Kosovës (UÇK) dhe të krerëve të saj në luftën për lirinë dhe pavarësinë e vendit.
Ajo ka rikujtuar gjithashtu mbështetjen e saj për Deklaratën e Kuvendit të Kosovës të 28 shtatorit 2026, lidhur me aktgjykimin e Dhomave të Specializuara në Hagë ndaj ish-krerëve të UÇK-së, Hashim Thaçit, Kadri Veselit, Jakup Krasniqit dhe Rexhep Selimit.
PDK zyrtarisht i kërkon Presidentes ta rikthejë në Kuvend Ligjin për Specialen
Presidentja ka ritheksuar qëndrimin e saj kundër çdo përpjekjeje për të shtrembëruar të vërtetën historike të Kosovës, për të vënë në dyshim karakterin çlirimtar të luftës apo për të barazuar popullin që luftoi për liri dhe mbijetesë me regjimin që e shtypi atë.
Sipas Presidencës, Shiroka-Pula ka zhvilluar dhe po vazhdon konsultimet me përfaqësues të institucioneve dhe subjekteve përkatëse shtetërore, me qëllim të bashkërendimit të veprimeve ndërinstitucionale dhe diplomatike.
Këto konsultime, siç thuhet në njoftim, synojnë dokumentimin, mbrojtjen dhe afirmimin e së vërtetës historike të luftës çlirimtare dhe rolit të UÇK-së, si dhe mbrojtjen sa më të mirë të të drejtave dhe interesave të ish-krerëve të saj që po gjykohen në Dhomat e Specializuara.
Vendimi i presidentes vjen pas kërkesës së PDK-së, e cila gjatë ditës kishte kërkuar rikthimin e ligjit në Kuvend, duke theksuar se qëllimi nuk është nisja e procesit nga e para, por përmirësimi i disa dispozitave dhe forcimi i sigurisë juridike.
PDK-ja kishte shprehur pritjen që ligji të miratohet sërish brenda pak javësh, duke theksuar se nuk do të heqë dorë nga hyrja e tij në fuqi.
Ligji ishte miratuar nga Kuvendi i Kosovës më 6 tetor 2026, ndërsa me vendimin e presidentes ai do t’i nënshtrohet një shqyrtimi të ri parlamentar./Telegrafi.
