Sulmuesi i Kombëtares së Kosovës, Vedat Muriqi, pritet të jetë në dispozicion të Fenerbahçes për ndeshjen e radhës në Superligën e Turqisë ndaj Rizesporit.
Muriqi kërkoi zëvendësim gjatë ndeshjes së Kosovës kundër Austrisë, të zhvilluar të dielën mbrëma në stadiumin “Fadil Vokrri”.
Sulmuesi 32-vjeçar u largua nga fusha në minutën e 66-të, duke ngritur pikëpyetje rreth gjendjes së tij fizike.
Megjithatë, mediat turke raportojnë se gjendja e Muriqit nuk paraqet shqetësim serioz dhe se ai pritet të jetë i gatshëm për duelin e së shtunës ndaj Rizesporit.
Mediumi turk “Fanatik” ka raportuar se rikthimi i Marco Asensios dhe paraqitjet e Romelu Lukakut me Belgjikën i kanë shtuar alternativat e Fenerbahçes në repartin ofensiv, ndërsa në këtë grup pritet të jetë edhe Muriqi.
“Rikthimi në fushë i Marco Asensios ka kënaqur stafin teknik, ndërsa performanca e Romelu Lukakut për ekipin kombëtar belg dhe fakti që Vedat Muriqi, i cili u lëndua gjatë grumbullimit të ekipit kombëtar të Kosovës, po luan mirë dhe do të jetë në dispozicion për ndeshjen kundër Rizesporit, kanë rritur alternativat, veçanërisht në vijën sulmuese”, shkruan “Fanatik”.
Muriqi po kalon një formë shumë të mirë këtë sezon me fanellën e Fenerbahçes.
Sulmuesi kosovar ka realizuar gjashtë gola në gjashtë ndeshje, duke qenë një prej lojtarëve kryesorë të skuadrës turke në fazën e parë të sezonit. /Telegrafi/
