Princ Harry dhe gjashtë persona të tjerë të njohur janë urdhëruar t’i paguajnë botuesit të “Daily Mail” 9.54 milionë funte, rreth 11 milionë euro, pasi humbën një proces gjyqësor për privatësinë në Gjykatën e Lartë të Londrës.
Mes paditësve janë edhe këngëtari i njohur Sir Elton John dhe aktorja Liz Hurley, raportojnë mediat britanike.
Shtatë paditësit duhet ta kryejnë këtë pagesë deri më 28 gusht. Megjithatë, kjo shumë përfaqëson vetëm një pagesë fillestare, ndërsa kostot totale ligjore që mund t’u ngarkohen mund të arrijnë deri në 34.5 milionë paund, rreth 40 milionë euro.
Gjykatësi Nicklin mori vendimin në lidhje me shpenzimet duke marrë parasysh mënyrën se si ishte zhvilluar procesi gjyqësor.
Ai veçanërisht theksoi pretendimet e pabazuara se drejtuesit e kompanisë mediatike Associated Newspapers Limited (ANL) kishin gënjyer gjatë hetimit publik Leveson.
Gjykata vendosi gjithashtu që kostot e botuesit të llogariten sipas një baze më të favorshme për të, duke i mundësuar kompanisë të rikuperojë një pjesë më të madhe të shpenzimeve të saj.
Grupi kishte paditur ANL-në për pretendime se kompania kishte mbledhur informacione në mënyrë të paligjshme. Botuesi i “Daily Mail” i kishte mohuar me forcë këto akuza që në fillim.
Më 7 korrik, gjykatësi i hodhi poshtë paditë, duke argumentuar se paditësit nuk kishin arritur t’i provonin pretendimet e tyre.
Përveç Princ Harryt, në proces ishin përfshirë edhe Sir Elton John dhe bashkëshorti i tij, David Furnish, aktorja Liz Hurley, stilistja Sadie Frost, ish-politikani Sir Simon Hughes dhe baronesha Doreen Lawrence.
Paditësit kanë afat deri më 2 tetor për të paraqitur një apel kundër vendimit.
Pas vendimit të korrikut, Princ Harry dhe baronesha Lawrence, djali i së cilës, Stephen, u vra në vitin 1993, publikuan një deklaratë të përbashkët.
“Erdhëm në gjykatë për të kërkuar drejtësi dhe përgjegjësi. Nuk morëm asnjërën prej tyre”, thanë ata.
“Kjo është një mbulim i plotë dhe i dukshëm i së vërtetës, por fatkeqësisht nuk është krejtësisht e papritur”, shtuan ata.
Gjatë procesit gjyqësor dëshmuan dhjetëra persona, ndërsa Princ Harry udhëtoi nga Shtetet e Bashkuara drejt Britanisë së Madhe për të marrë pjesë në seancat gjyqësore.
Dëshmi dhanë gjithashtu gazetarë dhe redaktorë, aktualë dhe ish-punonjës të “Associated Newspapers”, të cilët hodhën poshtë të gjitha akuzat për veprime të paligjshme.
Vendimi i fundit për kostot gjyqësore është bërë publik vetëm disa ditë pasi Duka dhe Dukesha e Sussex-it njoftuan rikthimin e tyre në Mbretërinë e Bashkuar.
Fëmijët e çiftit, Princi Archie, shtatë vjeç, dhe Princesha Lilibet, pesë vjeçe, pritet të nisin shkollën në Britani në muajin shtator. /Telegrafi/
