FSK shpall fituesit e garave sportive për nder të “Ditës së Forcës”

Forca e Sigurisë së Kosovës ka njoftuar se ka përmbyllur me sukses garat tradicionale sportive të organizuara në kuadër të aktiviteteve për shënimin e “Ditës së Forcës”.
Ceremonia përmbyllëse u zhvillua sot në Kazermën “Adem Jashari” në Prishtinë, ku u shpallën fituesit e të gjitha disiplinave. Siç thuhet në njoftimin e FSK-së në Facebook, para fillimit të ceremonisë u realizuan edhe takimet finale të garave, për të vazhduar më pas me ceremoninë e shpërndarjes së çmimeve. Në këtë ceremoni i pranishëm ishte zëvendëskomandanti i Forcës së Sigurisë së Kosovës gjeneral major Enver Cikaqi, si dhe oficerë e nënoficerë të Forcës së Sigurisë së Kosovës.
“Vendi i parë në futboll i takoi ekipit të KDS-së, në disiplinën e volejbollit vendin e parë e fitoi Regjimenti i Tretë i Këmbësorisë , në Shah më i miri u zgjodh OF1 Arsim Kelmendi, ndërsa në Kros në kategorinë e femrave vendin e parë e mori Ushtar i Klasit të Parë Edona Guri nga KDS, ndërsa në kategorinë e meshkujve vendi i parë i takoi Ushtar i Klasit të Parë, Leon Thaçi nga Regjimenti i Parë i Këmbësorisë”, shkruhet në postim.
Ky aktivitet kishte për qëllim, siç thuhet, promovimin e shëndetit fizik, frymës sportive dhe forcimin e bashkëpunimit ndërmjet pjesëtarëve të Forcës.

Lexo edhe nga Nacionale

Sadiku: 150 mijë votues më pak në Kosovë, tregojnë pakënaqësinë qytetare Deputeti i zgjedhur i Lidhjes Demokratike të Kosovës (LDK), Ermal Sadiku, ka kritikuar zhvillimet politike pas zgjedhjeve të...