Bilanci 24-orësh i Prokurorit të Shtetit: 48 aktakuza ndaj 58 personave dhe 11 të ndaluar

Prokurori i Shtetit ka publikuar raportin 24-orësh mbi aktivitetet kryesore të prokurorive të Kosovës.

Gjatë kësaj periudhe janë ngritur gjithsej 48 aktakuza kundër 58 personave, janë ndaluar 11 persona për vepra të ndryshme penale, si dhe janë paraqitur 7 kërkesa për caktimin e masës së paraburgimit ndaj 9 personave.

Gjatë periudhës raportuese nuk është regjistruar asnjë rast i bastisjeve apo sekuestrimeve.

Lexo edhe nga Nacionale

Nga Millosheviq te debakli zgjedhor: Ngritja dhe rënia e socialistëve në Serbi Pas më shumë se tri dekadash mbijetese politike, përfshirë rënien e regjimit të Sllobodan Millosheviqit dhe dy dekada...

Prokuroria Speciale, ka ndaluar 3 persona të dyshuar për veprat penale Mashtrimi, Hyrja e paautorizuar kompjuterike, si dhe Pjesëmarrja ose organizimi i grupit kriminal.

Prokuroria Themelore në Prishtinë, ka ngritur 10 aktakuza kundër 14 personave. Gjithashtu, ka ndaluar 4 persona (për Mbajtje të paautorizuar të armëve, Sulm, Lëndim të rëndë trupor dhe Ngacmim) dhe ka bërë 1 kërkesë për paraburgim ndaj 1 të mituri (për Posedim narkotikësh, Armëmbajtje pa leje dhe Kanosje).

Prokuroria Themelore në Prizren, ka ngritur numrin më të madh të aktakuzave — gjithsej 23 aktakuza kundër 27 personave. Nga kjo prokurori është ndaluar edhe 1 person për Pengim të personit zyrtar.

Prokuroria Themelore në Pejë, ka paraqitur 4 kërkesa për caktimin e paraburgimit kundër 6 personave për vepra si Grabitje, Sulm seksual dhe materiale të keqpërdorimit të fëmijëve, si dhe Dhunë në familje. Gjithashtu ka ngritur 1 aktakuzë për Shitje e blerje të paautorizuar të narkotikëve.

Prokuroria Themelore në Gjilan, ka ngritur 3 aktakuza kundër 3 personave, ka ndaluar 1 person për Dhunë në familje dhe ka parashtruar 1 kërkesë për paraburgim për Mashtrim.

Prokuroria Themelore në Gjakovë, ka ndaluar 2 persona — njërin për Dhunë në familje dhe tjetrin për Tregti të paautorizuar armësh/materiesh plasëse dhe Lajmërim të rremë.

Prokuroria Themelore në Mitrovicë: Ka ngritur 3 aktakuza kundër 3 personave për vepra si Posedim narkotikësh, Lëndim i rëndë trupor, Falsifikim dokumentesh, Kanosje dhe Shkaktim i rrezikut.

Prokuroria Themelore në Ferizaj, ka ngritur 4 aktakuza kundër 5 personave si dhe ka paraqitur 1 kërkesë për caktimin e paraburgimit për Dhunë në familje. /Telegrafi/