“Rotondo”, goditet një grup kriminal në Tiranë – Policia publikon pamje nga arrestimi i tyre

Policia e Shtetit ka bërë të ditur se ka goditur një grup kriminal në Tiranë, të përfshirë në trafikim dhe shitje të armëve të zjarrit.

Policia njofton se janë sekuestruar 6 pistoleta të trafikuara nga Mali i Zi, ndërkaq janë arrestuar në flagrancë dy persona.

“Si rezultat i një hetimi të kryer për dy muaj, me metoda proaktive, në koordinim me Prokurorinë e Tiranës, shërbimet e Komisariatit të Policisë Nr. 4, në vijim të kontrolleve dhe punës operative, me objektiv goditjen e veprimtarive kriminale të trafikimit dhe shitjes së armëve të zjarrit, finalizuan operacionin e koduar ‘Rotondo’.

Gjatë operacionit, u vunë në pranga shtetasit D. J., 31 vjeç, banues në Shkodër dhe F. Gj., 22 vjeç, banues në fshatin Domje”, thuhet në njoftim.

▶ Lexo edhe këtë

Tahiri: Kurti nuk e do Vjosa Osmanin për presidente, do personalitete të tjera ku e shtrin kontrollin e tij direkt

Automjeti që drejtonte 22-vjeçari dhe ku ishte pasagjer shtetasi D. J., u ndalua për kontrolle, në bashkëpunim me shërbimet e Forcës së Posaçme Operacionale të DVP Tiranë, në vendin e quajtur “Rrethi i Freskut”.

“Nga kontrollet në automjet, u gjetën 6 armë zjarri (pistoleta SigSauer) të dyshuara të trafikuara nga Mali i Zi, me qëllim shitjen në këtë zonë. Armët e zjarrit u sekuestruan bashkë me automjetin tip “Volkswagen” që drejtonte shtetasi F. Gj., si dhe me 4 celularë”, thuhet tutje.

Siç bëhet e ditur në njoftimin policor, në vijim të hetimeve rreth kësaj veprimtarie kriminale, u identifikua dhe u shpall në kërkim bashkëpunëtori i dyshuar i të arrestuarve, shtetasi E. S..

“Vijon puna për kapjen e shtetasit të shpallur në kërkim, si dhe në drejtimin e Prokurorisë, vijojnë hetime për të nxjerrë përpara përgjegjësisë penale, shtetas të tjerë që mund të jenë përfshirë në këtë rast. Materialet procedurale iu referuan Prokurorisë së Tiranës, për veprime të mëtejshme”, thuhet në fund të komunikatës. /Telegrafi/