Real Madrid ka plane për të adresuar disa pozita në skuadrën e Alvaro Arbeloas gjatë afatit kalimtar të verës, ku një nga më urgjentet është qendra e mbrojtjes.
David Alaba pritet të largohet pas skadimit të kontratës së tij në qershor, ndërsa ekziston edhe mundësia që Antonio Rudiger ta ndjekë atë drejt largimit. Për këtë arsye, një (ose dy) transferime në këtë repart duken të domosdoshme.
Në javët e fundit është folur shumë për interesimin e Real Madridit për Nico Schlotterbeck, i cili pritet të largohet nga Borussia Dortmund gjatë verës. Ai është në listë, por e njëjta gjë vlen edhe për Ibrahima Konate.
Real Madridi fillimisht e kishte përjashtuar mundësinë e transferimit të Konates më herët gjatë sezonit, por ai tashmë është rikthyer në planet e klubit.
Sipas raportimeve të Mundo Deportivo, një marrëveshje për ta sjellë mbrojtësin francez në “Santiago Bernabeu” po afrohet, pasi ai ende nuk ka rinovuar kontratën me Liverpool.
Kontrata aktuale e Konates skadon në fund të sezonit dhe ai ende nuk ka vendosur se ku do të luajë sezonin e ardhshëm.
Mundësia për të qëndruar te Liverpooli nuk është mbyllur plotësisht, por me kalimin e ditëve po bëhet gjithnjë e më pak e mundshme, një situatë që i shkon për shtat Real Madridit.
Sa i përket zëvendësimit të Alabës, nuk ka shumë dyshime se Konate do të ishte një përforcim i shkëlqyer.
Edhe pse nuk ka pasur sezonin më të mirë me Liverpoolin, në formën e tij më të mirë ai është konsideruar si një nga mbrojtësit më të spikatur në Ligën Premier./Telegrafi/
