Serbia po përballet me një rënie serioze të lindshmërisë, ndërsa pasojat e këtij trendi ndihen gjithnjë e më shumë edhe në komunat e Luginës së Preshevës, veçanërisht në Preshevë dhe Bujanoc.
Sipas të dhënave paraprake të Zyrës së Statistikave të Republikës së Serbisë (RZS), gjatë vitit 2025 janë regjistruar gjithsej 58,445 lindje, shifra më e ulët në pesë vitet e fundit dhe 3.1 për qind më pak krahasuar me vitin 2024.
Edhe pse këto të dhëna janë në nivel shtetëror dhe nuk pasqyrojnë në mënyrë të detajuar situatën për çdo komunë, institucionet lokale dhe punonjësit shëndetësorë në Preshevë dhe Bujanoc konfirmojnë se rënia e lindjeve është e dukshme edhe në këto zona. Komuna që dikur njiheshin për lindshmëri më të lartë se mesatarja e Serbisë, sot po përballen me një realitet krejt tjetër.
Emigrimi i vazhdueshëm i të rinjve, mungesa e vendeve të punës, pasiguria ekonomike dhe mungesa e politikave konkrete mbështetëse për familjet e reja po ndikojnë drejtpërdrejt në vendimet për krijimin e familjes. Si pasojë, numri i lindjeve po bie, ndërsa popullsia po plaket me ritme shqetësuese.
Sipas RZS, rënia e lindjeve në Serbi ka filluar të jetë e qëndrueshme që nga viti 2022, i cili shënoi edhe vitin e fundit me një rritje të lehtë.
Krahasuar me vitin 2019, kur në nivelin shtetëror lindën 63,484 fëmijë, në vitin 2025 ka rreth 5,000 lindje më pak. Edhe pse shifrat për vitin 2025 janë ende paraprake dhe zakonisht përditësohen me rezultate pak më të larta, trendi negativ mbetet i qartë.
Për Preshevën dhe Bujanocin, kjo situatë përbën një alarm serioz demografik. Pa ndërhyrje konkrete institucionale, pa politika për mbështetjen e familjeve, pa investime që do të ndalonin emigrimin dhe do të krijonin perspektivë për të rinjtë, rënia e lindjeve rrezikon të thellojë edhe më tej problemet sociale dhe ekonomike në këto komuna, duke vënë në pikëpyetje zhvillimin e tyre afatgjatë.
