Skena të rralla që shihen në fushat e futbollit janë regjistruar në divizionin e tretë të Zvicrës, ku një ish-lojtar i Interit dhe Brightonit u bë heroi i ditës duke shpëtuar stadiumin e ekipit të tij nga një katastrofë e mundshme.
Ezequiel Schelotto personalisht e shuajti një zjarr që shpërtheu pranë fushës gjatë një ndeshjeje dhe pamjet e reagimit të tij u bënë shpejt virale.
Incidenti ndodhi të shtunën e kaluar gjatë një ndeshjeje midis FC Bavois dhe FC Paradiso, në të cilën skuadra mysafire fitoi 2-1. Në një moment, një zjarr shpërtheu pas portës dhe kapiteni i Paradiso, Schelotto, 36 vjeç, pa menduar, vrapoi në skaj të fushës, mori një tub zjarri dhe i shuajti vetë flakët.
Shkaku i zjarrit nuk dihet ende, por gazeta britanike Daily Mail deklaron se një video që u përhap në Instagram tregon se zjarri shpërtheu pranë një banderole tifozësh dhe parkingut në stadiumin Campo Bian Scairolo, i cili ka një kapacitet prej 1,000 spektatorësh.
Schelotto, i lindur në Argjentinë, e kaloi pjesën më të madhe të karrierës së tij në Itali, ku luajti për Cesenën, Atalantën, Interin dhe Chievon. Më pas ai u transferua te Sporting Lisbona dhe në vitin 2017 nënshkroi për Brighton në një marrëveshje prej 2.5 milionë funtesh.
Ai bëri 28 paraqitje në Ligën Premier për Brighton midis viteve 2017 dhe 2020. Ai e kaloi sezonin e fundit në klub nën udhëheqjen e trajnerit Graham Potter, me të cilin, sipas raportimeve të medias, ai shpesh u përplas.
Incidenti me Zaha-n dhe rikthimi në ligat e ulëta
Koha e tij në Angli u shënua gjithashtu nga një incident i paharrueshëm me Ëilfried Zaha gjatë derbit të vitit 2020. Pasi Zaha e sulmoi fizikisht dhe e provokoi, Schelotto iu përgjigj me një gjest “fëmijë që qan”.
Pas Ligës Premier, ai luajti për klubet argjentinase Racing Club, Aldosivi dhe Deportivo Moron. Ai u kthye në Itali në vitin 2023 për t’u bashkuar me klubin e divizionit të dytë Barlette, përpara se të transferohej te skuadra zvicerane Paradiso vitin pasardhës. /Telegrafi/
