Shoferët nuk duhet të nxitojnë ende për të zëvendësuar gomat dimërore, pavarësisht se periudha ligjore për përdorimin e tyre po shkon drejt fundit. Kështu ka bërë të ditur Auto-Moto Shoqata e Serbisë (AMSS), duke theksuar se kushtet atmosferike vazhdojnë të jenë të paparashikueshme.
Sipas tyre, temperaturat gjatë mëngjeseve dhe netëve mbeten të ulëta, gjë që ndikon drejtpërdrejt në sigurinë gjatë vozitjes. Për më tepër, reshjet e shpeshta të pranverës dhe rrugët e lagështa e bëjnë drejtimin e automjetit më sfidues.
Ekspertët tërheqin vëmendjen edhe për dukshmërinë e reduktuar në disa zona, faktor që rrit rrezikun e aksidenteve. Situata bëhet edhe më e ndërlikuar në rajonet malore, ku nuk përjashtohet mundësia e reshjeve të lehta të borës, edhe pse jemi në stinën e pranverës.
Edhe pse shumë drejtues mendojnë se tashmë është koha për goma verore, AMSS rekomandon kujdes dhe durim. Gomat dimërore vazhdojnë të ofrojnë kapje më të mirë në temperatura të ulëta dhe në sipërfaqe të lagështa apo të rrëshqitshme, duke rritur ndjeshëm sigurinë në rrugë.
