Xhiroja e 11-të në Superligën e Kosovës në futboll përmbyllet me dy ndeshje që janë në program për t’u zhvilluar këtë të diel.
Malisheva e pret Feronikelin 74 në stadiumin “Liman Gegaj”, në një takim që nis nga ora 13:00.
Përballja e parë mes këtyre dy skuadrave, e zhvilluar në stadiumin “Rexhep Rexhepi”, ishte mbyllur me fitoren e malishevasve me rezultat 3-0.
Para këtij takimi, Malisheva hyn si lidere e Superligës së Kosovës me 26 pikë, ndërsa Feronikeli 74 renditet në pozitën e shtatë me 11 pikë.
Derbi i kësaj jave zhvillohet në stadiumin “18 Qershori”, ku Dukagjini e pret Gjilanin nga ora 17:00.
Ndeshja e parë mes këtyre dy skuadrave, e zhvilluar në Gjilan, ishte mbyllur në barazim 2-2.
Gjilani hyn në këtë përballje nga pozita e pestë me 18 pikë, ndërsa Dukagjini renditet i gjashti me 17 pikë, duke e bërë këtë duel të rëndësishëm edhe në garën për pozitat e sipërme të tabelës.
Në takimet e tjera të zhvilluara në kuadër të javës së 11-të, Ballkani mposhti Drenicën me rezultat 4-0, Prishtina triumfoi si mysafire ndaj Llapit me rezultat 1-0, ndërsa Drita mposhti Vushtrrinë 3-1. /Telegrafi/