Çfarë pas luftës në Iran, cilët janë skenarët e mundshëm?

Askush nuk mund të thotë se si do të zhvillohet lufta SHBA–Izrael kundër Iranit, e lëre më çfarë do të ndodhë me Iranin pasi përplasjet të marrin fund. Ekspertët kanë ndarë mendimet e tyre mbi drejtimin që mund të marrë qeveria iraniane nga ky moment.

Kur Shtetet e Bashkuara të Amerikës dhe Izraeli filluan sulmet ndaj Iranit më 28 shkurt, njerëzit në Teheran dolën në tarracat e tyre dhe brohoritën.

Ky reagim nga iranianët nuk ishte ajo që dikush do të priste, duke pasur parasysh natyrën kundërthënëse të luftës sipas së drejtës ndërkombëtare dhe mënyrën se si qeveria iraniane i sheh SHBA-në dhe Izraelin si armiq të ashpër, shkruan DW.

Megjithatë, shumë iranianë duket se janë të gatshëm të pranojnë viktima civile dhe shkatërrime, nëse kjo do të thotë rrëzimin e regjimit të tyre teokratik të urryer. Ndërsa SHBA-ja ka bërë deklarata të ndryshme dhe ndonjëherë kontradiktore mbi qëllimin e luftës, ndryshimi i regjimit mbetet një mundësi.

Foto: Donald Trump / Reuters telegrafi.com

▶ Lexo edhe këtë

A mund t’ua ndalojë BE-ja hyrjen në Shengen ish-ushtarëve rusë?

Presidenti i SHBA-së, Donald Trump, iu drejtua drejtpërdrejt iranianëve që kishin organizuar protesta masive antiqeveritare në janar, duke u bërë thirrje të ngrihen, transmeton Telegrafi.

“Kur të përfundojmë, merrni në dorë qeverinë tuaj. Do të jetë e juaja për ta marrë. Kjo ndoshta do të jetë e vetmja mundësi për breza”, pohoi ai.

Vetëm pak orë më vonë, u raportua se udhëheqësi suprem i Iranit, Ali Khamenei, ishte vrarë në një sulm.

Megjithatë, edhe me Khamenein të zhdukur, regjimi iranian mbetet ende plotësisht funksional, me politikanin veteran Ali Larijani në krye. Nëse SHBA-ja dhe Izraeli do të arrijnë qëllimet e tyre të luftës dhe çfarë të ardhme do të ketë Irani, mbetet e paqartë.

Trump mund të jetë i kënaqur të shohë një pasardhës të Khameneit të emëruar që është më në përputhje me interesat e SHBA-së. Presidenti amerikan i tha The New York Times se ka “tre opsione shumë të mira” në mendje, megjithëse nuk përmendi asnjë emër.

Zhvillimet e fundit nga përplasjet ushtarake në Lindjen e Mesme