Artistja shqiptare me famë botërore Bebe Rexha ka ndarë së fundmi një tjetër sukses me fansat e saj, duke konfirmuar edhe një herë ndikimin e saj në skenën ndërkombëtare të muzikës.
Kënga e saj më e fundit “New Religion”, në bashkëpunim me grupin Faithless, ka pasur një performancë të shkëlqyer në top-listat britanike dhe amerikane, madje duke arritur edhe vendin e parë në iTunes.
Megjithatë, projekti muzikor po dominon edhe në një tjetër platformë të njohur globale, Shazam. Rexha ka ndarë me ndjekësit e saj në X (ish-Twitter) një fotografi që tregon se “New Religion” ndodhet aktualisht në krye të kërkimeve në Shazam.
“Shazam nuk gënjen”, ka shkruar në X këngëtarja shqiptare me origjinë nga Maqedonia e Veriut.
Ky rezultat tregon se fansat e muzikës në mbarë botën po shprehin interes të madh për këngën, duke përdorur aplikacionin për të identifikuar titullin dhe artisten që e interpreton.
“New Religion” konsiderohet një nga këngët më të suksesshme të albumit të saj të ri në ardhje, “Dirty Blonde”, i cili pritet të publikohet i plotë në qershor. Ky sukses i radhës forcon edhe më shumë pozicionin e Bebe Rexhës në tregun ndërkombëtar të muzikës dance dhe pop. /Telegrafi/
