Një aksident i rëndë trafiku ka ndodhur në Turqinë jugore, ku një autobus pasagjerësh ka dalë nga rruga në provincën Antalya, duke rezultuar me tetë persona që humbën jetën dhe dhjetëra të tjerë që pësuan lëndime.
Ngjarja ka ndodhur në zonën Dosemealti, në veriperëndim të qytetit të Antalyas. Pamjet e publikuara nga mediat turke tregojnë autobusin të përmbysur jashtë rrugës, ndërsa ekipet e emergjencës kanë reaguar menjëherë duke u dalë në ndihmë pasagjerëve.
Autoritetet lokale kanë bërë të ditur se 26 persona janë dërguar për trajtim mjekësor, disa prej të cilëve ndodhen në gjendje të rënduar shëndetësore. Autobusi po udhëtonte gjatë natës nga Tekirdag drejt Antalyas.
Sipas informatave paraprake, dyshohet se kushtet e vështira atmosferike mund të kenë ndikuar në humbjen e kontrollit të automjetit. Hetimet për zbardhjen e plotë të shkaqeve të aksidentit janë duke vazhduar.
