Një anije luksoze turistike që kishte nisur një udhëtim disa-vjeçar rreth botës ka pezulluar lundrimin për shkak të rritjes së jashtëzakonshme të kostove të karburantit, duke lënë pasagjerët të bllokuar në Kamboxhia.
Kompania amerikane Villa Vie Residences, operatorja e anijes “Villa Vie Odyssey”, tha se po bashkëpunon me pasagjerët për organizimin e zbarkimit dhe sigurimin e akomodimit të përkohshëm.
Nuk dihet saktësisht sa persona ndodheshin në bord, por anija, e gjatë afro 200 metra, ka kapacitet për deri në 650 pasagjerë. Ajo u nis nga Belfasti në tetor të vitit 2024, me synimin për të përshkuar botën në një udhëtim të pandërprerë.
Sipas kompanisë, kostoja mujore e karburantit për kabinë në disa pjesë të Azisë është rritur deri në 8 mijë dollarë, nga rreth 1.800 dollarë më parë. Rritja e çmimeve të karburanteve në tregjet globale ka ardhur pas nisjes së luftës me Iranin në fillim të këtij viti.
Operatori tha se kishte ndërmarrë masa për të ulur konsumin, përfshirë ngadalësimin e itinerarit dhe qëndrimin më të gjatë në porte. Megjithatë, këto masa nuk mjaftuan për të kompensuar rritjen e jashtëzakonshme të shpenzimeve.
“Kalimi i gjithë kësaj rritjeje të kostove te banorët e anijes nuk është zgjidhje realiste”, deklaroi kompania, transmeton Telegrafi.
Ajo njoftoi se 60 ditët e ardhshme do t’i kushtohen ristrukturimit dhe sigurimit të kapitalit të ri, por paralajmëroi se nuk ka garanci për rezultatin e këtij procesi.
– YouTube www.youtube.com
Udhëtimi i “Villa Vie Odyssey” ishte planifikuar të zgjaste tre vjet e gjysmë dhe të përfshinte afro 150 shtete. Para nisjes, projekti ishte përballur me vonesa për shkak të riparimeve të anijes, duke lënë pasagjerët të bllokuar për muaj të tërë në Belfast dhe duke i kushtuar kompanisë miliona paund.
Anija kishte kaluar më shumë se 750 ditë në udhëtimin rreth botës kur kompania njoftoi të martën pezullimin e lundrimit. Sipas agjencisë Bloomberg, rreth 200 pasagjerë ndodheshin në bord kur u udhëzuan të zbarkonin në Kamboxhia, duke cituar themeluesin e kompanisë.
Njëra prej pasagjereve, Holly Hennessey, i tha BBC-së nga Kamboxhia se nuk e kishte imagjinuar se do të kalonte kaq shumë kohë në këtë vend. Ajo tregoi se pasagjerët janë shpërndarë në hotele të ndryshme dhe po presin të mësojnë se çfarë do të ndodhë më tej.
Anija është e pajisur me disa bare dhe restorante, një pishinë dhe një fushë për pickleball. Kabinat për banim të përhershëm shiten me çmime nga 120 mijë deri në 440 mijë dollarë, ndërsa mund të merren edhe me qira, duke filluar nga 3.500 dollarë në muaj.
Vitin e kaluar, kompania prezantoi një program që u mundësonte klientëve të siguronin banim në bord për gjithë jetën, duke synuar veçanërisht personat që dëshironin t’i kalonin vitet e pensionit në det.
Në vitin 2024, pak ditë pasi Donald Trump fitoi mandatin e tij të dytë presidencial, kompania promovoi edhe një paketë katërvjeçare të quajtur “Skip Forward”. Drejtori ekzekutiv e kishte përshkruar atë si një mundësi për njerëzit që kishin thënë se do të largoheshin nga SHBA-ja nëse zgjedhjet fitoheshin nga një kandidat i caktuar.
Hennessey tha se pasagjerëve u ishte kërkuar më herët të shqyrtonin mundësinë e pagesës së një tarife shtesë për karburantin, ndërsa itinerari ishte shkurtuar ndjeshëm. Disa prej tyre kishin vendosur të largoheshin nga anija dhe të vazhdonin udhëtimin në rrugë tokësore.
Megjithatë, Hennessey dhe disa pasagjerë të tjerë kanë vendosur të qëndrojnë në Kamboxhia, me shpresën se anija do të rifillojë lundrimin.
“Derisa të na thonë se gjithçka ka përfunduar përfundimisht, nuk do të dorëzohem. Nuk mund ta përsëris askund tjetër këtë mënyrë jetese. Ideja për t’u kthyer në shtëpi do të ishte kaq e zakonshme”, tha ajo, duke shtuar se Kamboxhia nuk është vendi më i keq për të pritur. /Telegrafi/
