Senati francez miraton projektligjin që parashikon deri në 10 mijë euro gjobë për dëmet gjatë protestave

Senati francez ka miratuar një projektligj që synon t’i bëjë protestuesit financiarisht përgjegjës për dëmet e shkaktuara gjatë demonstratave, duke parashikuar pagesa deri në 10 mijë euro.

Nisma duhet të shqyrtohet dhe të miratohet edhe nga Asambleja Kombëtare për të hyrë në fuqi, transmeton Telegrafi.

Projektligji u miratua të mërkurën me 229 vota pro dhe 105 kundër, me mbështetjen e një aleance të së djathtës dhe qendrës, e cila ka shumicën në Senat. Tashmë, teksti do të kalojë për debat dhe votim në Asamblenë Kombëtare, ku ndarjet politike mund ta vështirësojnë procesin.

Lexo edhe nga Bota

Çmimet e ushqimeve në Kosovë dhe Evropë – ku janë më të shtrenjta dhe pse? Çmimet e produkteve ushqimore ndryshojnë ndjeshëm në të gjithë Evropën. Buka mund të kushtojë më shumë se tri...

Nisma u paraqit pas trazirave që shpërthyen në maj, pasi Paris Saint-Germain mposhti Arsenalin në finalen e Ligës së Kampionëve. Ajo ka marrë rëndësi të re pas protestave kundër pabarazisë dhe rritjes së çmimeve më 17 tetor, të cilat përfunduan me dhunë dhe dëmtimin ose plaçkitjen e mijëra bizneseve.

Duke folur në parlament, ministri i Brendshëm, Laurent Nuñez, theksoi urgjencën për të reaguar ndaj dëmeve dhe skenave të kaosit. “Nuk mund të lejojmë më që shumica dërrmuese e bashkëqytetarëve tanë të paguajë për një pakicë vandalësh”, tha ai.

Megjithatë, kritikët paralajmërojnë se përgjegjësia financiare mund të shtrihet edhe te personat që nuk i kanë shkaktuar drejtpërdrejt dëmet, nëse konstatohet se kanë marrë pjesë me vetëdije në një grup të krijuar për të kryer akte vandalizmi.

Projektligji parashikon gjithashtu mundësinë e sekuestrimit të përfitimeve sociale dhe ndihmës për strehim për të mbuluar kostot e dëmeve. Kjo masë ka nxitur kritika nga deputetë të së majtës dhe organizata për të drejtat e njeriut.

Amnesty International ka paralajmëruar se këto masa mund t’i shtyjnë “familjet tashmë të margjinalizuara edhe më tej drejt varfërisë”.

Franca nuk është vendi i vetëm evropian që po shqyrton masa më të ashpra pas protestave të dhunshme. Në Itali, një dekret i ri për sigurinë parashikon dënime më të rënda për pjesëmarrjen në protesta të dhunshme, përfshirë burgim nga katër deri në 12 vjet për organizatorët e grupeve të përfshira në demonstrata të tilla. /Telegrafi/