Presidenti amerikan, Donald Trump, njoftoi se SHBA-ja do të dërgojë 5000 trupa shtesë në Poloni, vetëm shtatë ditë pasi Pentagoni anuloi dislokimin e planifikuar më herët të 4000 ushtarëve.
Trump, përmes rrjetit Truth Social, tha se vendimi është marrë për shkak të marrëdhënieve të tij me presidentin polak Karol Nawrocki, të cilin e kishte mbështetur gjatë zgjedhjeve presidenciale të vitit të kaluar.
Ai nuk sqaroi nëse bëhet fjalë për të njëjtin kontingjent të planifikuar më herët apo për një operacion krejtësisht të ri.
Shtëpia e Bardhë javët e fundit kishte sinjalizuar se synon të zvogëlojë praninë ushtarake amerikane në Evropë në kuadër të politikës “America First”.
Më herët këtë muaj, Uashingtoni paralajmëroi edhe tërheqjen e 5000 ushtarëve nga Gjermania pas përplasjeve mes Trumpit dhe kancelarit gjerman Friedrich Merz lidhur me luftën ndaj Iranit.
Ende nuk është e qartë nëse trupat që do të dërgohen në Poloni do të jenë pjesë e forcave që po tërhiqen nga Gjermania apo do të vijnë nga njësi të tjera amerikane. Trump më herët kishte kritikuar aleatët e NATO-s, duke i akuzuar se nuk po marrin barrë më të madhe në përballjen me Iranin dhe tensionet rreth Ngushticës së Hormuzit.
Ministrat e Jashtëm të vendeve të NATO-s pritet të takohen në Suedi, ku do të marrë pjesë edhe Sekretari amerikan i Shtetit, Marco Rubio. Sipas pritjeve, ai do të kërkojë që partnerët evropianë të marrin më shumë përgjegjësi brenda aleancës.
Njoftimi i Trumpit vjen vetëm një javë pasi Departamenti amerikan i Luftës kishte pezulluar papritur dërgimin e 4000 ushtarëve në Poloni. Sekretari i Mbrojtjes, Pete Hegseth, më pas deklaroi se bëhej fjalë vetëm për një “shtyrje të përkohshme” dhe se SHBA-ja do të vazhdojë të ruajë një prani të fortë ushtarake në Poloni. /Telegrafi/
