Një shtetas 29-vjeçar i Kosovës është arrestuar në Basel të Zvicrës, nën dyshimin për përfshirje në një tentativë vjedhjeje me thyerje. Ai u arrestua së bashku me një shtetas bullgar 48-vjeçar, ndërsa personi i tretë i dyshuar është ende në arrati.
Sipas njoftimit të Zyrës së Prokurorit Publik të Basel-Stadt, ngjarja ndodhi të dielën, më 1 nëntor 2026, rreth orës 18:20, në rrugën Haltingerstrasse, ku tre burra u përpoqën të hynin me forcë në një pronë, shkruan Telegrafi.
Një person që dëshmoi incidentin njoftoi Policinë Kantonale të Basel-Stadt, e cila ndërhyri në vendngjarje dhe arriti t’i arrestonte dy nga të dyshuarit në emër të Prokurorisë Publike.
Dy të dyshuarit u arrestuan në vendngjarje
Sipas hetimeve paraprake të Policisë Kriminale të Prokurorisë Publike, me mbërritjen e policisë, njëri nga burrat tentoi të largohej, por u kap dhe u arrestua. Një tjetër i dyshuar u arrestua po ashtu në vendngjarje.
Ndërkaq, personi i tretë ishte larguar në drejtim të panjohur para se të mbërrinte policia.
Autoritetet kanë bërë të ditur se dy personat e arrestuar janë një shtetas bullgar 48-vjeçar dhe një shtetas kosovar 29-vjeçar.
Policia kërkon ndihmën e qytetarëve për identifikimin e të dyshuarit
Në njoftim, autoritetet kanë publikuar edhe përshkrimin e personit të tretë, i cili ende nuk është identifikuar. Ai përshkruhet si burrë me pamje nga Evropa Qendrore, i veshur me pantallona të gjata me ngjyrë të çelët dhe atlete të bardha.
Kushdo që ka informacione relevante lidhur me rastin mund të kontaktojë Departamentin e Hetimit Penal të Zyrës së Prokurorit Publik në numrin +41 61 267 71 11, ose stacionin më të afërt të policisë.
Njoftimi është publikuar nga autoritetet e Basel-Stadt më 2 nëntor 2026./Telegrafi/