Pas humbjeve të mëdha të republikanëve në zgjedhjet afatmesme në SHBA, një parti që në masë të madhe mbështeti luftën kundër Iranit, kryetari i Parlamentit iranian, Mohammad Bagher Qalibaf, deklaroi të mërkurën se qytetarët amerikanë kishin votuar kundër luftës, duke shtuar se Teherani e mbështet këtë mesazh.
“Qoftë për arsye ndërgjegjeje apo për shkak të kostos së jetesës, amerikanët thanë JO LUFTËS dhe ne e mbështesim këtë mesazh”, shkroi Qalibaf në një deklaratë të publikuar në platformën X.
Ai paralajmëroi se nëse qeveria amerikane shpërfill vullnetin e qytetarëve të saj për t’u shërbyer “padronëve dhe shantazhuesve ndërkombëtarë”, do të përballet me një “makth”, transmeton Telegrafi.
Edhe zëvendëskryetari i Parlamentit iranian, Ali Nikzad, e cilësoi humbjen e presidentit amerikan, Donald Trump, në zgjedhje si pasojë të “disfatës së tij përballë popullit iranian”.
Duke folur para deputetëve, Nikzad tha se rezultatet zgjedhore pasqyronin “dështimin e përpjekjeve të SHBA-së për ta dobësuar Iranin përmes sanksioneve ekonomike dhe presionit”.
“Presidenti i mashtruar amerikan, i cili përpiqet ta paraqesë veten si fitues përmes deklaratave në rrjetet sociale, ka pësuar gjithashtu disfatë në politikën e brendshme”, u shpreh ai, duke shtuar se këto rezultate ishin “pasojat e mëvonshme të humbjes së tij përballë popullit iranian”.
Nikzad paralajmëroi gjithashtu kundër çdo aventure ushtarake në Ngushticën e Hormuzit, duke thënë se një veprim i tillë do të merrte “një përgjigje dërrmuese”.
Ndërkohë, Seyed Mehdi Tabatabaei, zëvendësdrejtor për komunikim dhe informim në zyrën e presidentit iranian, tha se rezultatet e zgjedhjeve amerikane përfaqësonin një mesazh të fuqishëm nga votuesit amerikanë.
“Bota e dëgjoi mesazhin e fuqishëm të popullit amerikan në zgjedhjet për Senatin dhe Kongresin”, deklaroi ai.
Tabatabaei ia atribuoi humbjen e republikanëve mbështetjes së SHBA-së për veprimet e Izraelit në Gaza, përputhjes së politikave amerikane me interesat izraelite dhe luftës kundër Iranit.
“Krimet kundër njerëzimit në Gaza, mbështetja e verbër e interesave të regjimit të paligjshëm izraelit dhe lufta e pafundme kundër Republikës Islamike të Iranit i shkaktuan Partisë Republikane humbjen më të madhe në historinë e zgjedhjeve amerikane”, tha ai.
Deklaratat e zyrtarëve iranianë vijnë pas zgjedhjeve afatmesme të së martës në SHBA, në të cilat demokratët parashikohej të fitonin kontrollin e të dyja dhomave të Kongresit, Senatit dhe Dhomës së Përfaqësuesve. Rezultati përbën një goditje politike për Trumpin dhe Partinë Republikane.
Trumpi, së bashku me Izraelin, nisi luftën kundër Iranit në muajin shkurt.
Ndërkohë, Katari po vazhdon përpjekjet ndërmjetësuese mes Uashingtonit dhe Teheranit, në një kohë tensionesh lidhur me bllokadën detare amerikane dhe sigurinë në Ngushticën e Hormuzit.
Irani deklaroi të hënën se vazhdon të shkëmbejë mesazhe me SHBA-në përmes ndërmjetësve, ndërsa theksoi se rihapja e ngushticës varet nga përfundimi i bllokadës amerikane. /Telegrafi/